Республикалул Халкьуннал творчествалул къатлул ва изобразительный искусствардал П.С. ХIамзатовал цIанийсса Дагъусттаннал музейрал сакиншиннарайну МахIачкъалалив тIиртIунни цайнува цивппа хьусса художниктурал «Самородки Дагестана» цIанилусса выставка.
Шикку ккаккиялун дирхьуну дур Ккуллал райондалиясса, Ваччиял шяравасса, цайнува цивппа хьусса художниктурал – ХIажи ва Ибрагьим Ссунгъуровхъал ва Дарбантлиясса Мерисмяил Сеидовлул дирхьусса 100-нния лирчусса суратру.
Республикалул Халкьуннал творчествалул къатлул директор Марита МухIадовал цилва ихтилатраву кIицI лавгуна, 2012-ку шиная шийннай щаллу дуллалисса Республикалул «Самородки» проектрайн бувну, цайнува цивппа хьусса художниктураща бюхълай бушиву цалла творчество ккаккан дуван.
– ХIакьину жу ккаккан буллай буру ХIажи ва Ибрагьим Ссунгъуровхъул ва Мерисмяил Сеидов кунмасса ххаллилсса художниктал. Вай цимилгу гьуртту хьуссар цайминнащалсса выставкарттайгу, дурссар цаллалуссагу. Гьарцагу вайннал дурсса даву хъанахъиссар искусствалул цайнува цуппалусса произведение, цилгу чIалачIи буллалисса авторнал гьунар, мунан дуниял чIалачIисса куц ва щихачIав къалащаву, – увкуна ванил.
Махъру ялагу лавхъуна ДР-лул миллатрал политикалул ва диннал иширттал министр Энрик Муслимовлул, П.С. ХIамзатовал цIанийсса музейрал директор СалихIат ХIамзатовал ва цайминнал.
Выставка лахъи лагантIиссар февральданул 16-ннин.