ЗахIматрал министерствалул баян бунни

Дагъусттаннал ЗахIматрал ва социал къайгъурдал министерствалул баян бунни 2022-ку шиналсса социал выплатартту буллай бушиву.

Миннувух бушиву оьрчIан гьарца зуруй булайсса пособие, ххюйлчинсса ва ххишала­сса оьрчI бувсса чIумал ахIвал кIюласса кулпатирттан булай­сса пособие, кIинничалт, шанничалт ва миннуяр ххишала­сса оьрчIру цал архIал бувсса чIумал цал булайсса пособие, оьрчIру цалчинмур классравун нанийни ахIвал кIюласса кулпатирттан мукунма цал булайсса пособие, шанна шинава арулла шинавун бияннинсса оьрчIан гьарца зуруй булайсса пособие, цалчинсса оьрчI бувкун ягу оьрчI цилашиврий бацIан бувкун гьарца зуруй булай­сса пособие ва вакцина бувну махъ цIуллу-цIакьшиву дуруччаврил ялув булайсса пособие. Вай кIицI лавгсса циняв пособиярттансса, январь зуруйсса арцу аьркиннийн дуркIссар, агьалиначIан чIумуй диян аьркинссар. Бусанну шиккува цаппара пособияртту утти Пенсионный фондрал биялалийн бувтшивугу, балжину миннуяту министерствалул сайтрай бувсун бушиву.