Вай гьантрай МахIачкъалалив Редукторный поселокрайсса Цалчинмур азарханалул коллективран дука-хIачIанмур диян дунни, агьали «ятIул зоналий» зузиминнал чIарав бушиву ккаккан буван кунма.
Ва даврил сиптачиталгу бия Peretz Group и СПОК «Магарамкент» тIисса компаниярттал группарду. ВайннацIун кабавкьуна Республикалул Жагьилтурал министерствалул ва #МыВместе тIисса региондалул клубрал. Ва давриву гьуртту хьусса жагьилтурал иширттал министр Камил Сяидовлул бувсунни медициналул зузалтран ахттайнсса диян дуллалисса акциярду Дагъусттаннал БакIчи Сергей Меликовлул сипталийну хьушиву ва тамансса инсантуран ва пикри ххуй бивзун гьуртту хъанай бушиву. Бувсунни укунсса даврил медициналул зузалтрал дакIру цахъис таза дуккан дуллалишиву, гъилисса дукиягу, хурмалул 100 ящик ва «Спасибо, Доктор» тIисса чичру дусса кIира метра дусса торт биян бувшиву. Азарханалул хъунама хIакин ХIажимурад Маллаевлул кIицI лавгунни медициналул зузалт барчаллагь учиншиврул зий бакъашиву, цалла даву дакIнийхтуну дуллай бушиву, амма укунсса бахшишругу тIааьнну душиву. «ЯтIул зонардай» зузиминнан дукрарду диян дуллан тIий бур февральданул 21-нин.
