Февраль зурул 2-нний Сталинград шагьрулухсса талатавурттаву совет аьралуннал ххит бувссар немецнал аьрал.
Ва кьинилуцIун бавхIуну Дагъусттаннайсса «Волонтеры Победы» тIисса щалагу Аьрасатнал жяматийсса суккушиндарал председатель МахIаммад ХIусайханов ва «Матери России» суккушиндарал МахIачкъалаливсса председатель Сефижат МахIаммадрасулова бивунни Сталинградрахлусса талатавурттал гьурттучи, Буттал кIанттул цIанийсса Хъунмасса дяъвилул ветеран Ильяс КазихановлучIан.
ДакIнийн бутан, 1941-1942-ку шиннардий МахIачкъалалия ва Буйнакскалия арх бакъа сакин бувну бивкIссар 91-мур битултрал дивизия. Шиву бивкIссар 600-ннийн бивсса дагъусттанлувтал. Вай бакъассагу, Сталинградрахлусса талатавурттаву гьуртту хьуссар 2 азарунния ливчусса дагъусттанлувтал. Ва талатаву хьуссар КIилчинмур дунияллул дяъвилуву ца яла хъуннамур аьрали операция.
Ванияр махъри дяъвилул ишру немецнан тIайлабацIу бакъа бавчусса. Сталинградрахлусса талатавуртту нанисса чIумал, Дагъусттаннай най диркIссар резервистал, халкьуннал ополчениялул кьюкьри, истребительтурал батальонну, партизантурал кьюкьри хIадур дуллалисса обороналул давуртту.