Дагъусттаннал шагьрурдай ва районнай яхъанахъисса Буттал кIанттул цIанийсса Хъун дяъвилул ветерантурачIан шаппа-шаппай бивунни ЗахIматрал ва социал къайгъурдал министерствалул вакилтал, социал идарарттал зузалт.

Вайннал, ветерантурал хIал­кьазиягу ххал бувну, був­­сунни коронавирус къадиян­сса чаранная, дарчIунни ми­ннан дагьайсса социал хIаллих­шиннардая ва коронавирусрал профилактикалия балжину бусласисса памяткартту. Мукунма дакIнийн бувтунни, агар ветерантуран медициналул идарарттайн биян багьлай бухьурча, Минтрудрал автотранспорт ккаккан дурну душиву ми биян буллан, буцлан. ДарчIунни ветерантурайх, ми аякьалулун ласун буржлув­сса идарарттал ва социал зузалтрал телефоннал номерду бу­сса визиткарттугу. Минтрудрал сияхIрай бур хIакьинусса кьини 33 ветеран. ЧIун-чIумуй миннал ялтту буккайшиву бувсунни миннацIун цIакь бувсса социал идарарттал зузалтрал.