Февральданул 9-нний Дагъусттаннал ХIукуматрал Председательнал буржру бартбигьлагьима Аьбдулмуслим Аьбдулмуслимовлул каялувшиврий ВКС-рал низамрай хьунни республикалий промышленностьрал сурсатру закондалуцIун дакъаркьуну дахлахаврийн къаршисса комиссиялул батIаву.

Аьбдулмуслим Аьбдулмуслимовлул тIимунийну, республикалий дачин дурну дур ккаккан дурсса низамрай маркарду лачIун къабувну, закондалий дакъа хъус-хъиншиву дахлахаврийн къаршисса даву, миннувух усру ва янна, дукия, пIапIрусру ва хIан.
«Базардаву дахлахисса промышленностьрал сурсатирттал хъунмасса кIану бугьлай бур ххютуйсса экономикалул машлуву, мунил тамансса асар биян буллай бур республикалул бюджетравун налогру дучIан даврийн», – кунни Аьбдулмуслимовлул. Премьер-министрнал бувсунни аьркинну душиву балжисса профилактикалул давуртту дачин дуван республикалий промышленностьрал сурсатру закондалий дакъа дахлахаврил хьхьичIалу кьукьаву мурадрай. Мукунсса даву ттинингу дачин дурну диркIссар ихтиярду дуруччай органнал, дур миннул хIасиллугу.
Республикалий закондалий дакъа усру дахлахаврил ялув бацIавурттал хIасиллал хIакъираву бувсунни Дагъусттаннал Таможнилул хъунама Сергей Троцкол. Ихтилатчинал тIимунийну, 2021 шинал 4-мур кварталданий республикалул таможнилул дурну дур 4 хъирив лаяврил даву. Ашкара бувну бур дахлай бивкIшиву 15000 чут ­уссал маркарду бакъанма. Хъиривлаявуртту дурну дур Дарбантуллал райондалий, МахIачкъалалив ва Каспийскалий. Ми иширттал хIакъиравусса материаллу дуллуну дур ДР-лул МВД-лул хасъсса органнайн тахсирлувтал танмихIирттайн кIункIу баншиврул.
Дагъусттаннал Таможнилул 2021 шинал дурсса давурттал аьмсса хIасиллу дуллай, Сергей Троцкол бувсунни дурну диркIшиву 22 хъиривлаяву ФСБ-лул, МВД-лул ва Роспотребнадзорданул органнащал цачIу. Ашкара бувну бур 58000 чут маркарду бакъасса уссал.
Ххал бигьлагьисса масъалалул хIакъираву ихтилат бунни мукунма МВД-лул Экономикалул мюхчаншиврул ва Коррупциялийн къарши буккаврил управлениялул хъунаманал хъиривчув Заур Мусаевлул ва цайминналгу.