Жула артистътал Троицк шагьрулий

Уттигъанну Троицк шагьрулул Культуралул къатлуву Дагъусттаннаясса артистътурал ккаккан дунни концерт. Шадлугърал сакиншинначину хьунни Челябинскаллал филармония, Челябинскаллал губернаторнал кабакьаврийну.

Дагъусттан Республикалул халкьуннал ва лайкь хьусса артистътурал Ххадижат Жамалуттиновал, Рукьият ХIамзатовал, Умайра Шяъбановал, Шагьалай МахIаммадовал ва Диляра Надировал ва кьини цалва язими балайрду щаллу бувссар ва шагьрулул инсантуран.
Челябинскаллал филармониялул солисткахъалгу щаллу був­ссар жулла республикалул халкьуннал мазурдийсса балайрду.
Ва шагьрулул бакIчинал хъиривчув Кирилл Рогель, жулва артистътурахь барчаллагь тIий, укун тIий ур:
– Цинявппагу тамашачитурал, шагьрулул жяматрал чулуха хъунмасса барчаллагь тIий ура укун ххаллилсса концертрахлу. Троицк шагьрулул ва Дагъус­ттаннал дянив дуссар тарихрал цаппарасса ххаллугу. ХIакьину зугу кIул хьунну жул бургъил шагьрулущал. Укунна ххуйсса программалущал ялугьлай буру зух цIунилгу.
Вара мяъналийсса ихтилат бувссар «Ассамблея народов Челябинской области» Ассоциациялул советрал ва «Дагъусттаннал культуралул общество» жяматийсса организациялул прдседатель ХанахIмад Гюловлул.
Шадлугърая махъ Дагъус­ттаннаясса балайчитуран буллуссар шагьрулул бакIчинал цIаниясса барчаллагьру.
Ва аьрххилий хьусса жулва лакку душваращалсса, Дагъус­ттаннал паччахIлугърал филармониялул директорнал хъиривчув София Разуеващалсса ва Да­гъусттаннал лайкь хьусса артистка Шагьалай Ма­хIам­мадоващалсса, гьарта-гьарзасса ихтилат булунну хъиривмур номерданий.