Ттигъанну Ккуллал райондалул администрациялул актовый залдануву шадлугърал тагьарданий райондалул бакIчи Шамил Рамазановлул аьрщарал ва хъуслил министрнал хъиривчув Эмиль Ттаттаевлун дуллунни «Ккуллал райондалул бусравсса гражданин» тIисса цIа.
Эмиль Ттаттаев ур Хъусращиял шяраватусса, увну ва хъуна хьуну ур МахIачкъалалив.
ДГУ-лул юридический факультет хьхьичIунсса ккаккиярттащал къуртал бувну, зий ивкIссар МВД-лул структурардай личIи-личIисса къуллугъирттай. 2013-ку шинал зун увкIссар ДР-лул Шяраваллил хозяйствалул министерствалийн. Махъсса шиннардий зий уссия шяраваллал кIанттурду хьхьичIунмай баврил ялувсса управлениялул каялувчину. Ларгсса шинал июнь зуруй ивтссар ДР-лул аьрщарал ва хъуслил министрнал хъиривчувну.
Эмиль Ттаттаев Ккуллал ва Лакрал районнай кIулссар социал-экономикалул иширттаву гьар мудан кабакьлакьисса хIакьсса патриот хIисаврай.
Ванал хIарачатрацIух «Комплексное развитие сельских территорий» тIисса республикалул программалул лагрулий чулийн буккан бан бювхъуссар Ккуллал райондалий агьамсса социал-экономикалул проектру.
Хъусращиял шяраву бувссар ттизаманнул тIалавшиндарацIун бавкьусса ФАП, школалул багъраву бувгьуссар ахъулссаннул мурхьру. Цала мачча-гъанмигу кIункIу бувну, хъуннасса гьурттушинна дурссар «100 школ» программалул лагрулий Хъусращиял школа капитальныйну ремонт бан.
ЦIанасса чIумал ванал кабакьаврицIух Ккулув, Вихьлив ва Хъусрахь буллай буссар паркру, ххуй дуллай буссар жямат батIайсса кIанттурдал чIалачIин. Ми давуртту цирдагу къуртал дан ккаккан дурну дуссар шинал ахирданийнин.
Шамил Рамазановлул барчаллагь увкунни Эмиль Ттаттаевлухь район хьхьичIуннай дан буллалисса кумаграхлу.
