Райондалул шадлугъирттай Ккуллал шяраваллил спортшколалул жагьилсса гимнасткахъал ккаккан буллалисса номерду ттинин цимилгу багьуна ттул янилун.

Шиккува кIицI буван ччива Ккуллал райондалий мукьра шяраву бушиву спортшкола: Ккулув, Хъусрахь, Ваччав, Вихьлив. Аьмну вай хъанай бур ца школану. На лавгсса спортшколалийн «Кулинская детско-юношеская спортивная школа» учай. Гьай-гьай, на цалчин акъаяв Ккуллал спортшколалийн лавгссагу, микку шайсса лачIун буккаврил, кару дишаврил (армспорт), волейболданул турнирдай тамаша бувангу, макьала чичингу. Му буссар Ккуллал 2-мур школалул ва Бигьалагай паркрал дянив. Школалул къатрах урувгсса чIумал, вай лахьлай буссар, хъаругу тIитIин дурну, цахъис хIаллай аглан хьусса зунттал барзуха.
Ваччату Ккулув на увцунав ва школалул директор Кьурбайтаев Ажублул. Жу школалувун бувхсса чIумал най дия тренировка. Исвагьисса, чаннасса, чурх таза буккан буллансса аьркинлугъру дусса залданул ттул дакI тирх учин дурна. Хъиннува на рязи увунав, гимнасткахъал дянив бавцIуну, дуллантIимуния бусласисса тренер, Кьурбайтаева Паризатлул. Ванил къуртал бувну бур ДГПУ-лул физкультуралул факультет 2003-ку шинал. Мунияр махъ зий бур ва спортшколалий. Жагьилсса гимнасткахъул тренироват буллалаву дакъассагу, ванил лавайми классирттаву дуклакисса душварал волейболданул командарттугу тренироват дувайсса дия. Паризат цуппагу Ажублул кулпат бивкIун бия.
Гьай-гьай, на тавакъю був­ссия Ажублухь цаятува буси куну.
– На 2000-ку шинал къуртал бувссар ДГПУ-лул физкультурный факультет. Мунияр махъ зий ура шикку, ва школалул тренерну. На тренироват буллай ура лачIунбуккулт ва ММА-лул пурмалий биллан ччими.
Ажублул на кIул увунав спортшколалул цайми кIан­ттурдащалгу. НукIура спортшколалул ца чулух диркIсса шяраваллил клубрал къатри дия дакьин дурну, волейболданий бу­ккайсса залданийн кIура даен дурну. Лагмава бувну бия тамашачитал щябикIайсса кIанттурду. Ажублул бувсуна вай, аьпа биву, Саэд ХIасниевич сагъсса чIумал, 2016-ку шинал, бакьин бувну бивкIшиву. Бия мукунма хъинну чIярусса аьркинлугъру дусса тренажер зал ва гъилисса щинащалсса душругу. Бувсуна Ажублул буллай бушиву соревнованияртту дуний хъамаллуран чак буван хасъсса къаттагу. Шиккува, спортшколалул чулух, бувну бия мини-футболданий буккайсса майдан. Ахттая махъ ссят шамунния байбивхьуну, спортшкола оьрчIал бувцIуну бикIайсса бия ссят урчIра хьуннин. Ажуб акъа, спортшколалий зий ия ялагу урчIа тренер.
ХIасил, ва кьинисса, Ккуллал шяравунсса, аьрххи дакIний ххаришивуртту ххишала дан­сса хьуна.