* * *
Ци ххирасса шампуннай, бальзамирттай шюшларчагу, кIиз, гъагъу-матIу хьуну, був­ккун бачинтIиссар зу пластикалул ттарал экьикъаруртссаксса. Пластикалул ттаралданул кIизун хъинну заралсса «напряжение» хIасул дуллалиссар – 60 азарва вольт. Вайннул дуллалисса микроразрядыртталли кIиз заэв буллалисса. Ишла дувара тIаннул, кьурттарал ва цамургу тIабиаьтрал материалданул ттараллу. Шиккугу агьаммур шартI – ттарал ялтту лак ягу краска дурксса дикIан къааьркин­ссар. Яла-яла хъинссар (кIизунгу, аьмну нервардал системалунгу) букрал тIаннул ттарал.

* * *
ТIаннул ттарал дачIи шинай цал даххана дуллан аьркин­ссар. Му, бюхъавай, щинай къашюршуну хъинссар. МарцI дуван нюжмардий цал спирт ду­ккаван аьркинссар.

* * *
Дукра канан 20-30 минутI­рал хьхьичI щинал стакан хIачIлачIаву аьдатравун дутара, ххира хьун дара жула чурххан чара бакъа аьркинсса щин. Мудан хIачIлачIисса щинал организмалул хIал-тагьар къулай дуллалиссар, инсан ххишаласса дукра дукавриягу махъаллил уллалиссар.

* * *
Шахьан дуваймур кофе хIарчIун махъ маанавар бу­ккару чIанулун дагьсса дукь экьирутIин. Вай, ца банкалувун датIлай, салкьи хьувкун, дутIияра мивунна ца-кIира къуса хьюмусса (ягу, гъили лаган дурну, хьюму дурсса) ницIал. Ялун чансса мюршсса хьхьирил цIугу бивчуну, ххуйну хIала дувара. Вайннуя зун хьунтIиссар чурххансса ххуйсса скраб, щинавун бучIайни ишла дувансса. Яла-яла – нихъри, ссюрхъру ва никру ссуку дуван хъинну дучIи лякъинтIиссар.

* * *
Ччя-ччяни баххана булувара кIараллил къатта ва спиртрайн щусса паммалух марцI булувара телефондалул корпус. Вай дур жулла лажиннаравун цинияргу чIяруну щилащисса затру.

* * *
ЧIири бивчуну махъ ятIул лаглагисса (раздражение) бурчу паракьат бувантIиссар ччимур апттикIрай кIапIикIирттан дахлахисса салицил кислатIалул. Ва мукунна дуккан бучIиссар хъаралухгу, каруннайх ва ччаннайхгу. Ванил бурчу бактериярттая буручлачиссар.

* * *
ДакIний битияра, шкафравусса, чIамурдайсса низам – бакIравусса низамри, бакIравусса низам – оьрмулувусса низамри.

* * *
Чара бакъа гьантлун ца гьивч булукияра. Най буна щалва букан къахьурча, бачIи-бачIи: кIюрххил бувкумур – ххуйшиврун, гьанттайнмай бувкумур – цIуллу-сагъшиврун.