Дагъусттан Республикалул Культуралул министерствалий хьунни ва шинал планнавусса концертирттан ва фестиваллан хас дурсса батIаву.

Гьашину Министерствалул ва «Дагестан-концерт» ГБУ-лул цачIуну дуван дакIний бур 9 концерт, цинярдагурив – 11 шадлугъ.
Цалчинмур хьунтIиссар 5-мур мартрай Оьруснал театрданул Хъунмур залдануву, Дунияллул халкьуннал дянивсса Хъаннил кьинилун хасну. ПаччахIлугърал «Дагъусттан» ансамбльданул залдануву мартрал 29-нний хьунтIиссар региондалул БакIчи Сергей Меликовлул сипталийнусса Республикалул цалчин­сса мультижанрардал эстрадалул телевизион «Юность. Полет. Мечта» цIанилусса конкурс-фестивальданул хIасиллу дуллалисса батIаву. Конкурсрал финал хьунтIиссар Оьруснал театрдануву декабрьданул 9-10-нний.
Ва шинал дуван дакIнийсса хъунисса шадлугъирттал сияхIрай мукунна дур Ххувшаврил кьинилун хасъсса концерт (9-мур майрай), этно-рок-джазрал «РRОявление 05» фестиваль (июльданул 24-26-нний), Дагъусттан Республикалул Конституциялул кьинилун хас дурсса концерт (26-мур июль), Аьрасатнал Аьрали-Хьхьирил Флотрал кьинилун хасъсса концерт (31-мур июль), «Созвучие» фестиваль (августрал 15-21-нний), Халкьуннал цашиврул кьинилун хас дурсса концерт (сентябрьданул 15-нний), ретро-фестиваль «Долалай» (октябрьданул 26-27-нний), жагьилтурансса театрдал фестиваль (ноябрьданул 25-26-нний).
Москавуллал Литератортурал къатлуву декабрьданул 5-нний хьунтIиссар Фазу Аьлиевал юбилейран хас дурсса батIаву.