Январь зурул 26-нний ДР-лул захIматрал ва социал хьхьичIуннайшиврул министрнал бигарду биттур буллалисса Изумруд МухIуттиновал ххал диргьунни дахьва байбивхьусса ишбажаранчитурал «Социальный контракт» лагрулий дачин дурсса проектру.
Цалчин Изумруд МухIуттинова бивунни ишбажаранчи Камил ХIасановлул тIивтIусса лепка дуллалисса цехравун. СоцсетирдайхчIин «Социальный контракт» проектрая кIул хьуну, айивхьуну ур Камил аьркинсса документру дузал буллай. Ва ивкIун ур гипсрая лепкарду дуллалисса цех тIитIинсса хияллай. Цаппара хIаллай помещениярттаву лепкалул давуртту дуллайгу ивкIун, лавхьхьуну бур Камиллун ва даврил хIалкьазия. «Социальный контрактрал» кумаграйну бювхъуну бур ванаща цала бизнес тIитIинсса цимурца оборудование машан ласун.
Цехраву дурсса кьай-кьуйгу ххал диргьуну, Изумруд МухIуттиновал цIухху-бусу бунни ванахь давриву хьунадакьлакьисса захIматшивуртту цукунсса дуссарив. Му бакъассагу, ванил кIицI лавгунни ва проект гихуннайгу дузрайн дуккан даву мурадрай министерствалул чулуха ка-кумаг бан хIадурну бушиву.
Каспийскалий ялапар хъанахъисса Динара Дагирова бур бухгалтерну зий бивкIсса инсан, цIанакул декретрал отпускалийн бувксса. «Социальный контрактрал» кумаграйну итадаркьусса арцуйну ванища бювхъуну бур аутсорсинграл хIаллихшиннарду биттур дуллан кумаг буллалисса офисрал къатри арендалий ласун.
Динарангу ва проектраву гьуртту хьусса цила гъансса душнийхчIин кIул хьуну бур социал контрактрая. Тамансса хIаллай таш-виш хъанайгу бивкIун, пикри хьуну бур, соцзащиталийн лавгун, цIухху-бусу бан. Шикку ванин балжину бувчIин бувну бур контрактрая ва кумаг бувну бур бизнес-план хIадур дан. Муния махъ ванил счетрайн дуркIун дур цила дуллалисса даву дузрайн дуккан дансса арцу.
Шиккува кIицI лаган, республикалий проект иширайну зузи дурния шинмай 870 миллион арцунсса 7 652 инсаннащал мукьра направлениялул социальный контрактирдал кьутIирду дурну дур.
Дагъусттаннал республикалий 2022-ку шиналгу «Социальный контрактрайхчIин» ка-кумаграх мюхтажсса инсантуран хIукуматрал чулухасса кумагру буллантIиссар. Гьашинусса шинал ва проект иширайну дузрайн дуккан даврин итадакьин ккаккан дурну дур 1 миллиард арцул.
Социал контракт – му хъанахъиссар соцзащиталул органнал прожиточный минимумраяр чансса доходру дусса (10628 къуруш 2021-ку шинал) кулпатирттащал дурсса кьутIи.
КьутIилул шартIирдайн бувну, хIукуматрал арцуйну ва цайми иширттайну кумагру буллай бур миски-гъаривсса кулпатирттан.
2021-ку шинал хIукуматрал чулухасса кумагру бувссар контрактравусса мукьрагу направлениялий, яни, даву ххал дан, цала даву тIитIин кумаг бан, захIматсса тагьарданува буккан бавринсса ва кулпатрал ахIвал-хIал къулай бавринсса ка-кумаг бавриву.
«Социал контрактраву» гьуртту хьун бюхъайссар Республикалул ЗахIматрал министерствалул соцзащитарттал к1антту-к1анттурдайсса идарарттайн аьрза буллуну.
