Сентябрь зурул 17-нний дуллай буру ЧIяйннал дянивмур даражалул школа тIивтIуну 110 шин шаврин хасъсса шадлугъ. Ваниннин 10 шинал хьхьичIгу дурссия ва школалул 100 шинал юбилейран хас дурсса диялсса давуртту.

КъакIулнангу кIул хьун, къабавнангу баяншиврул, ЧIяйннал школа хъанай бивкIссар Аьш­тиккуллал округрайсса халкьуннан буккин-чичин лахьхьин буллалисса цалчинсса идарану. Школа тIивтIусса чIумал шикку бивкIссар дахьва 2 класс, мигу цува заллусса Оьмаров Аьлил къатраву. Шикку дуклай бивкIун бур 20 оьрчI ва душ. Яла, Аьрасатнал паччахI Николай КIилчинманал амрулийн бувну, 50 азарда къуруш арцул итадаркьуну, бувссар цIанасса школалул цалчинмур корпус. Школа, бан бакIрайнгу лавсун, бувну къурталгу бувссар 1924 шинал, Аьштиккуллал наибну зий ивкIсса чIяйричув Насруттин КьурбанмахIаммадовлул арснал. Га хьуссар цIанасса Ккуллал райондалий тIивтIусса цалчинсса школану. Шиккун дуклан букIлай бивкIссар райондалул щархъал оьрчIру.
БакIрайра дарсру дихьлай бивкIун бур аьраб хIарпирдай, яла, 1938 шинайн бияннин – латин хIарпирдай, 1938 шиная шихунмай – цIанасса хIарпирдай. Школалул цалчинма каялувчину зий ивкIун ур ШавкIуллал шяраватусса ХIадис ХIажиев. Школалул корпус бувайхту, мунил хьуну дур байбихьулул школалул статус. Яла, 1935 шинал, Ккуллал район Лакралмуния личIи дурсса чIумал, райондалул центр тIивтIуссар ЧIяйннал шяраву. Школагу кIура баен бувссар щаллу бакъасса дянивмур даражалул школалул статусрайн, 1937 шинал тIурчан, школалия хьуссар дянивмур даражалул школа.
Дянивмур даражалул школалул цалчинма директорну зий ивкIссар Къяннал шяраватусса Кьасимов МахIаммад. Дяъви байбишайхту, 1941 шинал, итабавкьуссар цалчинсса выпуск. Шикку дуклай ивкIсса 6 отличник медаллу дакъана ливчIссар дяъви сававну. Школа къуртал бансса мугьлат къавхьуну, 6 лавгссар хушрай дяъвилийн. Миннавату зана къавхьуссар ХIасанов Мусалав ва Мудунов Шамсулвара, кIиягу ЧIятусса. Директор МахIаммад Кьасимовлуяту тIайла хьуну, чIявусса учительтал лавгссар дяъвилийн. Школалул хIаятраву 1967 шинал дацIан дурссар дяъвилийн лавгсса дуклаки оьрчIан ва учительтуран хас дурсса гьайкал.
Дяъви сававну, дахьва школа къуртал бувсса оьрчIру тIайла бувкссар райондалийсса школардай дарсру дихьлан, учительтал биялну бакъашиврийн бувну. ЧIяйннал школалийн тIурча, гьан бувну бивкIссар Москавлия, Рязанная, Украиннава, АьсатIиннава личIи-личIисса дарсирдал муаьллимтал. Ми, хъинну ххуйну кьамулгу бувну, хъунмасса хIаллай зийгу бивкIссар ва хIакьинугу миннайн барчаллагьрай буссар шяраваллил жямат ва дуклай бивкIми.
ЧIяйннал школалий дяъвилул шиннардий тIивтIуссар щархъая бувкIсса оьрчIан буттахъул дяъвилийн бувцуминнал ва зана къавхьуминнал оьрчIансса интернат. Вагу хьу­ссар вайннан кIилчинмур буттал къаттану. Шиная шинайн ду­ккаврил сий гьаз хъанай, шиккун дуклан букIлан бивкIссар Ахъушиял, Дахадаевуллал, Агъуллал, Рутуллал районнаясса оьрчIру.
ЧIяйннал школагу къуртал бувну, Москавлив МГИМО-лувун ухлахисса МахIач МахIам­мадовлул оьрус мазрал экзамендалул ххюва лавсъсса чIумал, оьрус оьрчIру бивкIун бур махIаттал хьуну, архсса зунттал чувнаща му кьимат ласун цукун бювхъуссар, цанма шанмарду, мукьварду бусса чIумал тIий.
1954 шинал итабавкьусса выпускниктуран республикалий дагьай дурну диркIун дур 7 медаль, миннувату 4 тIурча, ларсъссар ЧIяйннал школалул оьрчIал. Райондалий дуллалисса дарсирдал олимпиадарттай хьуннав, спортрал соревнованиярттай хьуннав, ЧIяйннал школалул мудангу бугьайссия цалчинсса кIанттурду.
Школа цуппагу 1990 шинайннин бивкIссар Серго Орджоникидзел цIанийсса. Муния махъ, Дагъусттаннал ХIукуматрал Указрайн бувну, школалун дирзссар школалул выпускник, шаэр Бадави Рамазановлул цIа.
Уттинин школа къуртал бувминнал кьюкьлуву бур 30-нния ливчусса элмурдал доктортал ва кандидатътал.
Шяраваллил агьулданун хъунмасса пахру буссар Буттал кIанттул цIанийсса Хъун дяъвилул Виричув ЦIаххуй МаккаевлуцIа.
Школалул 100 шинал юбилейран хасну итабавкьуну бу­ссар «Помним, любим, гордимся» тIисса аьнтIикIасса лу. Ва луттиран хъунмасса кьиматгу бивщуну, автортурангу дуллуссар ДР-лул ПаччахIлугърал премия.
ЧIяйннал школалун 110-шин шаврин цIа куну дуван дакIний буссару диял­сса давуртту, Занналгу кабавкьуну.
ДувантIиссар ЧIяйннал школалий дарсру дихьлай бивкIсса учительтуран хас дурсса олимпиадартту.
1.Оьрус мазрал учительтал – МахIаммадлул арс МахIаммадов ХIусайн, КьурбанмахIаммадлул арс Каримов МахIаммад, Кариннул душ Рамазанова Асбат (олимпиада хьунтIиссар апрельданул 9-нний 2022 ш.).
2. Лакку мазрал учительтал – ХIасанхIусайнов Бадави Рамазаннул арс, Макьсудов МахIаммад Макьсудлул арс, Рамазанов Сажид Рамазаннул арс ( олимпиада хьунтIиссар апрельданул 16-нний 2022 ш).
3. Биологиялул учительтал – ХIажиев Рамазан ХIажинал арс, Расулова ХIурия МахIаммадлул душ, СултIанахIмадова Ашрип Аьвдуллагьлул душ ( олимпиада хьунтIиссар апрельданул 23-нний 2022 ш).
4. Химиялул учитель – Амиров Апанни Амирдул арс (олимпиада хьунтIиссар апрельданул 30-нний 2022 ш).
5.Физикалул учительтал – Авчаев Исмяил МахIаммадлул арс, Пидуриева ПатIима Насруллагьлул душ (олимпиада хьунтIиссар апрельданул 30-нний 2022 ш).
6. Математикалул учительтал – Сулайманов Бадруттин Сулайманнул арс, Мусаев Ися Мусал арс, СултIанахIмадов Аьбид МахIаммадлул арс (олимпиада хьунтIиссар майрал 14-нний 2022 ш);
7. Историялул учительтал: МахIмудов Мудун МахIмудлул арс, СултIанахIмадов АхIмади МахIаммадлул арс, Маммакьурбанова Шакият Гъазима­хIаммадлул душ (олимпиада хьунтIиссар майрал 21-нний 2022 ш).
8.Географиялул учительтал – СултIанахIмадова Шамалай Аьвдуллагьлул душ, МахIаммадаьлиев Мансур МахIаммадаьлил арс, Аьбдуллаева ПатIимат Мусил душ (олимпиада хьунтIиссар майрал 21-нний 2022 ш).
Вай олимпиадартту дуллалиссар Ккуллал, Лакрал, Ахъушиял, ЦIуссалакрал, Дахадаевуллал, Агъуллал ва Рутуллал районнаясса дуклаки оьрчIал дянив. Ххув хьусса оьрчIан ва душваран дулунтIиссар арцуйнусса премияртту:
1-мур кIану бувгьунан – 5000 къуруш
2-мур кIану бувгьунан – 3000 къуруш
3-мур кIану бувгьунан – 2000 къуруш ва дипломру 1-мур, 2-мур, 3-мур даражалул.
Олимпиадартту дикIан­тIиссар 3 категориялул оьрчIал дянив:
5-7-ми классру, 8-9-ми классру, 10-11-ми классру.
Вайннул хIакъиравусса гьарза-гьартасса бувчIин бавур­тту дантIиссар олимпиадар­тту даврил хасъсса комиссияр­ттал районнал образованиялул управлениярттай.
Вара юбилейран хас дурну дантIий бур вайра районнаяту бучIан гъира буминнал дянив­сса волейболданий буккаврил соревнованиярттугу, цивгу хас дур­сса школалий хъунмасса хIаллай физкультуралул дарсру дихьлай бивкIсса учительтуран – Аьбдуллаев Пятали МахIаммадал арснан, Аьвдуллаев Сулайман Аьвдуллагьлул арснан ва Маккаев Жяъпархан ЦIаххуйл арснан.
1-мур кIану бувгьусса командалун бахшиш дур 15000 къуруш
2-мур кIану бувгьумунин – 10000 къуруш
3-мур кIану бувгьумунин – 8000 къуруш.
Вай тIуркIурду бикIантIиссар май зуруяту сентябрь зуруйн бияннин.
Махъва-махъмур бяст-ччал хьунтIиссар юбилейрал кьини, яни, 1-мур ва 2-мур кIантту бугьансса командартту ттуплий дуккантIиссар сентябрьданул 17-нний.
Вара юбилейран хас дурну дан тIий бур вайра районнаяту бучIан гъира бивзминнал дянив шахматирттал турнир, цувгу школалий мюрщи оьрчIахь дарс дихьлай ивкIсса учитель ХIусманов Ризван ХIусманнул арснал цIанийсса. Бяст-ччал бикIантIиссар кIива категориялул: 10-12 шин ва 13-16 шин. КIивагу категориялув1-мур кIану бувгьунан – 5000 къуруш, 2-мур кIану бувгьунан – 3000 къуруш, 3-мур кIану бувгьунан – 2000 къуруш ва дипломру 1-мур,2-мур,3-мур степеннал.
Му бакъассагу, лакку маз хъама къабитаврил ххуллий дантIиссар назмурду, шеърирду чичаврил конкурс, шанма категориялул инсантурал дянив: 10-20 шин хьуминнал, 20-40 шин хьуминнал ва 40-нния тихуннай­сса шинну думиннал дянив.
Назмурду чичин бюхъайссар школалуха, учительнаха, шяраваллиха. Ляхъан бувсса шеърирдах дулунтIиссар:
1-мур кIану – 3000 къуруш
2-мур кIану – 2000 къуруш
3-мур кIану – 1000 къуруш.
Жул умуд бур шеърирдал конкурсрал хIасиллу даврил ххуллий жуцIун кабакьинссар «Илчи» кказитрал редакциялул тIий, коми­ссиялул члентурал цIардугу сакин дурну.
Юбилейран хас бувну итабакьин тIий бур суратирттал к1ива альбом, циняв дарсру дихьлай бивкIсса учительтурал ва школа къуртал бувминнал шакиллугу дусса. Дуван тIий бур школалун хас дурсса киносуратгу.
Школалул администрация тавакъю буллай бур, ва макьала «Илчи» кказитрай дурккун мукьах, чялишсса гьурттушиву дуван ва чIарав бацIан школа къуртал бувминнахь, шяраваллил жяматрахь, шагьрурдай ва республикалул кьатIув ялапар хъанахъиминнахь. Гьан дувара зулла суратру, чичара зунма кIулмур, дакIний ливчIмур школалул оьр­мулияту, зухьра дарсру дихьлай бивкIсса муаьллимтурая.
Бусан-учин ччимур баян буван, чичин бюхъайссар ва адресрай:
368390
РД Кулинский р-он
с.Кая
kayasoch-sad@mail.ru с пометкой «К юбилею школы» ва чIумуйн бияннин 31.03.2022 г.
Телефон: 8-928-058-79-02
Шадлугърайн оьвтIиссару циняв бучIан ччиминнайн.

Нагу зул дуаьчи МахIаммад Оьмаров