Январьданул 29-нний Дагъусттаннал БакIчи Сергей Меликовлул каялувшиврий хьусса батIаврий дуруна республикалул 2021-ку шинал социал-экономикалул лябуккулул хIасиллу.
АПК-лул дурсса давурттал хIасиллал хIакъираву махъ лавхъунни ДР-лул шяраваллил хозяйствалул министрнал цалчинма хъиривчу Шарип Шариповлул. Мунал тIимунийну, бакIрайра дурсса ккаккиярттайн чул бивщуну, 2021-ку шинал Дагъусттаннал шяраваллил хозяйствалул бакIлахъиялул лагру хьуну дур 176 млрд къурушру, ягу 2020-ку шиналмуних бурувгун 100,5%.
Иширайну шяраваллил хозяйствалул циняв бутIрал планну бартдиргьуну дур.
Тамансса хьхьичIуннайшиву хьуну дур къама ласаврил бутIуву – ларсун дур 450 тонна къалмул, ягу 2020-ку шиналнияр 6,5 % ххишалану. Микку хъунмасса кIану бугьлай бур ппиринжрал бутIул. Ларгсса шинал ппиринжрал бакIлахъиялул лагру хьуну дур 118,9 азарда тонна, ягу 2020-ку шиналнияр 6,5% гьарзану.
ХьхьичIуннайшивуртту хьуну дур къюмайтIутIи батIаврил бутIувугу. 2021-ку шинал республикалий ларсун дур 237,9 тонна тIутIул, ягу хьхьичIмур шинах бурувгун 13,8% гьарзану.
2021-ку шинал Дагъусттаннай ларсун дур 200 азарда тонна ахъулссаннул. Ми хъанай дур хьхьичIмур шиналнияр 9,9 % ххишалану.
Шарип Шариповлул бувсунни мукунма цуксса зарал биян бувссарив Дагъусттаннан къурагьшиврул, хаснура Къизлардал лухччайн ва цукунсса давуртту дурну диркIссарив ми зараллу бухлаган баншиврул ДР-лул шяраваллил хозяйствалул министерствалул. Мунал бувсунни мукунма гьашину республикалул АПК-лул хьхьичI бавцIусса масъалартту бартбигьаврил хIакъиравугу.
