Гьава хъуруннил давурттацIун бавкьусса бушавугу хIисавравун лавсун, республикалул хъузалт бувккунни къурдарав.

2022-ку шинал Дагъусттаннай интту хъуру дугьлан аьркинну дур 225 азарда гектарданий. Миннувату сайки 42 азарда гектарданий дугьан тIий дур ахънилсса, 20,5 азарда гектарданий — нувщи. Ппиринж бугьан ккаккан дурну дур 26 азарда гектар аьрщарал, лазундарансса уртту дугьан най бур 26 азарда гектарданий, интту лачIа бугьан тIий бур сайки 70 азарда гектарданий.
Яла чIяруми инттухъуру дур Къизлардал райондалий – 36 азарда гектар, хъиривмур кIанттай дур Хасавюртуллал район – 33,2 азарда гектар. Тамансса хъуру дур Тарумовкаллал райондалий, сайки 16 азарда гектар, Бабаюртуллал райондалий 16 азарда гектар, Нугъайнал райондалий 12 азарда гектар, Дарбантуллал райондалий сайки 9 азарда гектар.
Метеорологтурал прогнозрайн бувну, инт ччяни дучIан тIий дур. ДР-лул Минсельхозпродрал районнайн ва хозяйстварттайн тапшур бувну бур, бугьансса гьанна ва аьркинсса техника цила чIумал хIадур дурну, гъайтIун буккан.
Февральданул 13-нний, интту хъунил давурттайн буккаву ххал даву мурадрай, Къизлардал райондалийсса ООО «Сириус» ва ООО «Орешевка» тIисса хозяйстварттавун бувкIунни ДР-лул шяраваллил хозяйствалул министрнал 1-ма хъиривчув Шарип Шарипов ва ДР-лул ФАНЦ-рал хъунама элмийсса зузала МахIаммад Баратов.
Хозяйстварттал каялувчитурал миннахь бувсунни циксса давуртту дурну дуссарив, цукун хIадур хьуну буссарив интту хъуру дугьлан.
Шарип Шариповлул бувсунни республикалул Минсельхозпродрай сакин бувну бушиву шяраваллил хозяйствалущал дахIаву дусса идарарттал давуртту дузал дуллансса республикалул штаб. «Жу хIадурну буру цила чIумал бартдигьин интту хъуру дугьаврил давуртту», – кунни Шарип Шариповлул.