Февраль зурул 11-нний Дагъусттаннал Регионнал Росреестр­данул управлениялул каялувчи Арсен ПирмахIаммадов хьунаавкьунни республикалул журналистътуращал. Шикку гьуртту хьунни Росреестрданул управлениялул ихтиярду щаллу даврил отделданул хъунмур Марият Кадилаева.

Управлениялул даврил агьамми масъалартту кIицI лаглай, Арсен ПирмахIаммадовлул балжину бувсунни «Гаражная амнистия», «Земля для стройки», «Социальная газификация» проектру иширайну зузи даврия.
ХIакьинусса кьини Дагъус­ттаннайсса 4500 объект ларсун дур Цасса паччахIлугърал недвижимостьрал реестрданийн. Объектру сияхIрайн ласласисса давриха зий бур паччахIлугърал властьрал ва кIанттул цила каялувшиндарал органну. Объектирдал заллухърунная, цала аьрщи сияхIрайн лахъан дансса аьрза булаву дакъасса, цукунчIавсса цайми тIалавшиннарду дакъассар.
Марият Кадилаевал дунни аьрщарал законнал хIакъиравусса цаппара бувчIин бавуртту. Ванил балжину бувчIин бунни аьрщарал документру бакъа 15-хъул шиннардий ялапар хъанай бивкIсса инсантуран, мадара бигьа хьушиву къатрал заллушиву исват дуллалисса ихтиярду щаллу дан. Укун­сса мурад бусса инсантураща, судрайн къабувккунма, кIанттул администрациялийхчIин, цачIава бусса документругу ишла бувну, бюхъантIиссар къатрал документру дузал бан.
Арсен ПирмахIаммадовлул мукунма бувсунни Владимир Путиннул хIукмулийн бувну дачин дурсса социал газификациялул программалия. Ва программалул лагрулий газопроводрая уква газ буцин бюхълай бур цала аьрщарал, къатрал дазуйн бияннин. Программалийн бувну, газопроводрая уква газ буцинсса ихтияр дуллуну дур так газ бувцуну бивкIсса щархъавун, районнайн ва шагьрурдайн. Социал газификациялул программа зий дикIантIиссар 2022-ку шинал ахирданийнин. Социал газификациялул программалул лагрулий уква газ буцинсса ихтияр дуссар кадастровый сияхIрай дирхьу­сса къатрахь, мукунна аьрщарал дазурдахьгу. Мунийн бувну, аьркинссар цал аьрщарал заллушиву тасттикь дуллалисса («зеленка») документ дузал бан. Му документ канихьхьун лавсун махъ бюхъайссар уква газ буцинсса аьрза булун.

Газопроводрая уква цала къатрачIан газ буцинсса программалувун къабагьаврил савав хъанай дур къатрал, аьрщарал заллуннахь «зеленкартту» бакъашиву.
Хъирив Управлениялул пишакартурал бувсунни туризмалунсса аьрщарал проектрая ва чIяву къатри бусса строительствалул даврил низамрая. Агьалинаща цала ихтиярдая гьарта-гьарзану кIул бан бюхъайссар Росреестрданул управлениялул сайтрай.
Ахирданий Арсен Пирма­хIаммадовлул Управлениялул дав­ривух чялишсса гьурттушинна дуллалисса журналистътуран буллунни Барчаллагьрал чагъарду.