Вай гьантрай Ккурккуллал школалий хьунни хъунасса шаэр А.С.Пушкиннун хас дурсса мероприятие.

Шикку гьуртту хьунни дуклаки оьрчIру, учительтал, нину-ппу. Школалул зал бия та чIумуха лавхьхьуну чIюлу бувну, чIирттайн лархъун дия шаэрнал суратру, ванал шеърирдавасса ххару, магьравасса суратру, экрандалия ккаккан буллай бия ванал оьрмулул шачIантту. Хъуними классирттал дуклаки оьрчIал бувсунни шаэрнал оьрмулия ва творчествалия, бувккунни ванал шеърирду. Яла-яларив тамашачитуран асар хьунни оьрчIал бунияласса артистътурал кунма бивхьусса «Евгений Онегин» романдалувасса парчри.
Мероприятие хIадур дурну дия оьрус мазрал ва литературалул учительтал Гульнара Магьдиевал ва Изольда Гъужиевал. Нитти- буттал барчаллагь увкунни учительтурахь, оьрчIащал укун ххаллилсса мероприятияртту дуллай тIий.
ЦIанасса, луттирдал кIану интернет-технологиярттал, гаджетирттал бувгьусса чIумал оьрчIавун луттирдахсса гъира бутан, ми жула литературалущал ва искусствалущал кIул бан хъунмасса бияла бур укунсса мероприятиярттахь. Му бакъассагу, вайннул ялун личин буллай бур оьрчIавусса гьунарду.