Зун бивкIунни нигьирттай музей

Февраль зурул 14-нний МахIачкъалалив «Ххувшаврил Поезд» нигьирттай музей тIитIлатIисса шадлугъ хьунни. Гьур­тту хьунни ва давриву Аьрасатнал ПаччахIлугърал депутат Артем Бичаев, Дагъусттаннал ХIукуматрал хъунаманал хъиривчув Муслим Телякавов, жагьилтурал иширттал министр (врио) Камил Сяидов, цIуллушиву дуруччаврил министр (врио) Татьяна Беляева, МахIачкъалаллал КIулшиву дулаврил управлениялул каялувчи Марат Ибрагьимов.

Муслим Телякавовлул кIицI лавгунни, Буттал кIанттул цIа­нийсса Хъунмасса дяъвилул тарих ххуйну кIулхьурчагума, хIакьну та дяъвилул лахIзарду итталу загьир буллалисса суратирттал выставкалул дакIру гьулусан дуллай душиву. Вагонну низамрай кувннил хъирив кув бушиврулгу бюххансса асар бутлай бушиву. «Ва проект оьрчIаву ва жагьилтураву патриот асарду цIакь буллалисса давур. Жу хIакьину цинявгу вагоннавух бувкру, буниялттунгу дяъвилийн багьсса кунмасса иш бия: вас-ццах, кьурчIишиву ва ххувшаврия­сса ххаришиву. Мунияту на дакI дарцIуну ура ва проектрал жагьилтурал дакIурдиву ватандалухсса ччаву куртI дуллалишиврий, патриот зумунусса асарду гьузиххин буллалишиврий. Ши­ккува кIицI лаганна Дагъус­ттаннал агьалинал выставкалух хъуннасса къулагъас душивугу. Регистрация дайдишайхтура циняв билетру бухлавгун бия (1500 билет)», – увкунни Камил Сяидовлул. Выставка укра ххал дуллалиссар, так музейрал сайтрай регистрация дурну дикIан аьркинссар. Вара кьини выставка ххал дунни Да­гъусттаннал вузирдаву дуклаки­сса кьатIаллил билаятирттаятусса студентътуралгу. Выставка зузи­ссар февраль зурул 16-ннийнин.