Республикалул ЗахIматрал министерствалул 2022-ку шинал «Демография» тIисса миллатрал проектрал лагрулий агьалинан цIанасса ппурттуву тIалавсса цаппара пишарду уква лахьхьин буллантIиссар.

Проектрайн бувну, уква пишарду лахьхьин ихтияр дуссар кIицI лавгсса инсантурахь:
1. 50 шинавусса ва гихунмай­сса пенсиялийн буккан хьхьичIсса оьрмулул инсантурахь;
2. ОьрчIан шанна шин хьуннинсса отпускалийн бувксса ниттихъахь;
3. ЗахIматрал кьутIирду къадурсса ва школалийн бачиннинсса 0-7 шинавун бияннинсса оьрчIру бусса ниттихъахь;
4. 35 шинавун бияннинсса жагьилсса инсантурахь:
– аьрали къуллугъ къуртал бувну 4 ва ххишаласса зурдардий зий къабивкIсса;
– кIулшивурттал (квалификациялул) документ лавсния шинмай 4 барз ва ххишала хьусса ;
– дянивсса ягу лавайсса даражалул кIулшивуртту дакъасса ва ми пишардал программартту лахьлай къабивкIсса инсантурахь;
– идарартту лакьлай, давуртту дакъа ливчIсса инсантурахь;
– шинал лажиндарай дянив­сса ва лавайсса даражалул пишардал хасъсса кIулшивуртту лахьлай бивкIсса, давурттал дузал байсса захIматрал идарарттал кумаграйну давурттал дузал къавхьусса инсантурахь.
Проектрал лагрулий уква пишарду лахьхьин буллали­сса кIулшивуртту дулаврил программартту дур кIира нюжмардия шанма зуруйн дияннин­сса. Пишардал кIулшивуртту дуллай бур очныйну, очныйну-заочныйну электрон журалий ва манзилданул кIулшивуртту дулаврил технологиярттай. Проектрал лагрулий пишарду лахьхьин бувминнава 75% инсантурал давурттал щаллу буллай бур.
2022-ку шинал Дагъусттаннал республикалун дуллуну дур 885 инсаннансса квота, миннава 123 инсан 35 шинал оьрмулувун ияннинсса категориялул. Вайннава чара бакъа давурттал дузал увну икIан аьркинну ур 664 инсан.
Шиккува кIицI лаган, 2021-ку шинал, укуннасса программа иширайну дузрайн дуккан даву мурадрай, «Работа в России» порталданийхчIин буллуну бивкIсса 2500 аьрзирава, кIулшивуртту ларсун дур 1591 инсаннал, 1360 инсан дузал увну ур давурттал. Мунийн бувну, республикалун ккаккан дурну диркIсса план биттур дурну дур 133,0% ххишалану.