Марихуана ябуллай бивкIми бувгьуну бур
Дагъусттаннал Росгвардиялул управлениялул «Ягуар» цIанилусса транспортный ОМОН- лул ва МахIачкъалаллал линейный управлениялул оператив отделениялул зузалтрал увгьуну ур чIявусса наркотикру ябуллалисса кIия инсан. КIул хьусса информациялул хъирив лаллай, зузалтрал цIухла бивхьуну бур Дарбантуллал райондалийсса шяраву ялапар хъанахъисса инсантурачIа. Ляркъуну дур 227,55 грамм марихуаналул. Вай ябуллай бивкIсса инсантал хьхьичIвагу, личIи-личIисса тахсир ккавккун (миннувух инсан ивчIавугу), танмихIрайн бувцуну бивкIсса бур.
Ва иширал хIакъираву сукку дурну дур уголов дело.
Кьуцурттавусса «уртту»
МахIачкъалаллал линейный управлениялул зузалтран, щак багьлай, хъирив бивзун, 46 шинавусса адаминал къатраву лявкъуну бур урттущалсса цаппара кьуцуртту. Эксперт-криминалистътурал ххал бувну, вай марихуана (114 гр.) бушиву кIул бувну бур.
Марихуана ябуллай ивкIма хьхьичIвагу уголов жавабрайн кIункIу увну ивкIун ур, наркотикру бусса ххяххия дугьлай ивкIун тIий.
Вара кьини транспортрал полициялул зузалтран, цIухла бивхьуну, цама адаминачIа (1956 ш.у.) лявкъуну бур ницIайхъувараха лархьхьусса уртту дусса кьуцуру. Экспертизалул кIул бувну бур вай марихуана бушиву (116 гр.).
ЦIана кIиягу адаминал хIакъираву уголов дело сукку дурну дур. Ва журалул тахсиркаршиву дурсса инсантал 10 шинайн бияннин дуснакь бан бюхъайссар.
КьюлтIсса информация аьч бан ччай ивкIун ур
Дагъусттаннал МВД-лул Силистталул управлениялул И.Р. ХIажиевлуй АьФ УК-лул 274 статьялул 1 бутIуйн багьайсса (компьютерданувусса кьюлтIсса информациялувун уххаву) тахсир ккавккун бур.
УФСБ-лул ва МВД-лул материаллайн бувну, чIалай бур 2021-ку шинал апрель зуруй И.Р. ХIажиев увххун ур АО «Электросвязь» ва ООО «Эллко» Интернет-провайдернал официал ресурсирдавун. Ва хIала уххаврил ми зия дурну, зарал хьуну бур. Ва журалул тахсиркаршиврух АьФ-лул УК-райн бувну 5 шинайн бияннин дуснакь бан бюхъайссар ва 1 миллиондалийн дирсса аьчIа дишин бюхъайссар.
