– Вакцина баврийну ва коронавирусрая мюхчан хьунсса тIалавшиннарду биттур даврийну бакъа инсантураща COVID-19 пандемиялуцIун дархIусса захIматсса тагьарданува буккан къахьунтIиссар, – тIий, оьвчаву дуллай ур цала миллатрайн ЦIуссалакрал райондалиясса ТIюхчардал шяраватусса ишбажаранчи Руслан Абакаров.

Коронавирусрал инфекция дацIан дан къахъанай, ппив хъанай душиврия хъунмасса зарал бивунни дунияллул ва Аьрасатнал экономикалийн. Пандемия сававну хъунмур зарал хьунни чIиримур ва дянивмур бизнесрайн. ЦIанасса ппурттуву ишбажаранчитал цукунсса шартIирдай зий буссарив буслай ур Руслан Абакаров:
– Гьай-гьай, пандемиялул бизнесрайн бакъассагу, асар биян бунни инсантурал оьрмурдайнгу. Эпидемия дусса ппур­ттуву агьалинан дацIан дан багьунни цалла дуллай бивкIсса маэшатрал ххуллийсса давуртту. Карантин баян бувсса ппурттуву ттулла предприятиялунгу хъунмасса зарал бивунни. Му чIумал ттун багьлай бия ци чулийгу хьхьичIунай ачинсса чаранну ххал буллан. Коронавирусрал азар ххарарххусса кIира шинал мутталийсса даврил хIасиллу дуллан ивкIукун, бувчIуна даву чIумул хъиннура кьянкьа-кьурчIи дуршиву. Лавхьхьунни захIматсса тагьарданувун агьсса чIумал тIайласса ва анаварсса хIукму буллан. КIицI лаганна цуппа ца лахIзалий хIура хьун къариртшиву ттула каялувшиндарайсса зузалтрал мюхчаншиву. Ттул цинявппагу зузалтрал, цивппа рязину лавгун, бунни вакцинартту. Даврий, инсантуращал хьунабакьлакьисса кIанттурдай вайннал цукунчIав маскарду хIура къадайссар ва биттур дуллай буссар цинярдагу тIалавшиннарду. Цинявппа цачIун хьунур жущара ва оьбаласса азар дух дан бюхъантIисса. Цал уттигу, жула лакрал агьали лавмартсса азардания мюхчан баву мурадрай, вакцина бара тIий, маслихIатрай лаизлай ура, – тIий ур Руслан Абакаров.