Февральданул 8-нний ДР-лул БакIчинал ва ХIукуматрал Администрациялул каялувчи Алексей ХIасановлул сипта­лий хьусса коронавирусрал инфекциялийн къаршисса Оператив штабрал батIаврий ххал бивгьунни республикалий санитар-эпидемиологиялул тагьарданул, азарданущалсса талатаврицIунсса чараннал ва къашайшалт хъин баврил хIакъиравусса масъалар­тту.

Алексей ХIасановлул тIи­мунийну, Республикалий коронавирусрал инфекциялуцIунсса тагьар захIматну дур, щала билаятрай кунна, амма мунил ялувбацIаву дуван бюхълай бур. ХьхьичIмур кьини сияхIрайн лавсун ур цIуну къашавай хьу­сса 726 инсан, ларгмур нюжмардий — 5 азаруннаха ливчусса къашайшалт. МуницIунма вакцинарду баврил бущи февральданий хIурхIа лавгун бур. Аьмну лавсун республикалий иммунизациялул даража цIанасса ппурттуву хIисавну бур вакцинарду буван аьркинминнал 60%. Мунийн бувну хIакьину яла агьамми масъаларттавасса ца хъанай бур койкарду гьарза буван хIадурну бикIаву ва мукунма кумаг буллан студентътал- медиктал буцаву.
ХьхьичIмур Оперштабрал протоколданул хIукмурду бартбигьаврил хIакъираву бувсунни ДР-лул ХIукуматрал Председательнал хъиривчув Мурад Казиевлул. Мунал бусаврийну, гужлан дуван аьркинну дур вакцинарду баврицIунсса информациялул кампания.
ХIакьину Дагъусттаннай зий бур вакцинарду байсса 154 кIану, дузал бувну бур 187 мобил бригада, хIадур бувну бур 2000 азарунниха ливчусса койкарду.
Региондалул Роспотребнадзорданул каялувчи Николай Павловлул тIимунийн бувну, хIакьинусса кьининийн сияхIрайн лавсун бур коронавирусрал инфекциялул къашавай хьусса 78 азарунния ливчусса инсантал. Миннаву пневмониялул къашавай хьуми чан хьуну бур.
ЦIусса коронавирусрал инфекция ялунгу ппив хъанай душавугу хIисавравун ларсун, Николай Павловлул бувсунни маскарду дахIаврил низам дуруччин аьркинну душиву уттигу циняв идарарттай, чIявусса халкь бавтIсса кIанттурдай, жяматийсса транспортрай, зузи кIанттурдайгу профилактикалул давурттал ялув бацIан аьркиншиву.
БатIаврий ихтилат бунни мукунма ДР-лул цIуллушиву дуруччаврил министр Татьяна Беляевал.
Оперштабрал батIаврий Алексей ХIасановлул муниципалитетирттал бакIчитурайн тапшур бунни гужлан дуван агьалинащалсса профилактикалул даву, анавар дуккан дуван вакцинарду баврил давуртту. Мунал бусаврийну, мартрайннин аьркинну бур 75% инсантурал вакцинарду буван. «Статистикалул чIалачIи буллай бур, вакцинарду бувми чIяву хъанахъиссаксса, азарханардайми чан хъанай бушиву», – кунни мунал.