Экономикалул лябуккулул хIасиллу

Январьданул 29-нний ДР-лул БакIчи Сергей Меликовлул каялувшиврий хьусса батIаврий дурунни 2021-ку шинал республикалул социал-экономикалул лябуккулул хIасиллу.

Республикалул каялувчинал тIимунийну, цIанасса ппурттуву яла агьаммину хъанай бур республикалул агьали газрал дузал баврил, строительствалул аралуву дахханашивуртту даврил (реформирование), инвестицияртту дучIан даврил масъалартту.
2021-ку шинал республикалий тамансса давуртту дурну дур лябуккулул цIусса даражалийн бияврил ххуллий. Дагъусттаннал социал-экономикалул лябуккулун ялун ххи бувсса кумаг бувну бур федерал даражалийгу. Цайми кумагирттащал архIал 2021-ку шинал Дагъусттаннан итадаркьуну дур 10,5 млрд къурушир­ттал бюджетрал кредит инфраструктурардал проектру бартдигьин кумагран. Ми арцу цалчин ярглий харж дантIий дур щинал дузал баврил системалун ва МахIачкъалаллал коллекторданул проект дуван.
Республикалул инвестициярдал программалул лагрулий 2021-ку шинал итадаркьунни 389 объектрансса арцу, миннува бартдиргьунни 47 объектрал строительствалул даву.
2021-ку шинал Дагъусттаннайн бувкIун бур 1 млн инсатураха ливчусса туристътал. Ми хъанай бур 2020-ку шинал бувкIминнаяр 30% ххишаласса.
МуницIунма, региондалул каялувчинал кIицI бунни, экономикалуву тамансса лябукку хьуну бур учин къабучIишиву. 2021-ку шинал бакIрайра дурсса хIасиллайну, экономикалул давурттал гьануми журардал хъус-хъиншиву итадакьаврил ва хIаллихшинну даврил индекс хьуну бушиву 102,2%. Меликовлул тIимунийну, му лябукку бакъар.
Шяраваллил хозяйствалул ва промышленностьрал давурттал ккаккияртту къаоьккисса дур – ми арардаву лябукку хъанай бур. Дур цаппара ялунбучIантIимур бу­сса проектру. Каширду дур, миннувух ризкьи ябавривугу, амма цавагу ризкьилул идара (предприятие) бакъар яттил дикI дугу-дуллай, зана-кьалагу дуллали­сса. Бачияра хIакьину ххал буванну шяраваллил хозяйство ва промышленность лядуккан дуллан зана-кьала даврил идарартту бувну», – лаивзунни исполнител властьрал органнайн региондалул каялувчи.
«Агьамссаннун ккаллину бур республикалий агьали давурттал дузал баврил масъалагу. Республикалий 2021-ку шинал давуртту дакъасса ивкIун ур 34 азара инсан (сияхIрайн лавсъсса). Давуртту дакъашиврул масъала хъиннува захIматну бур жагьилтурал дянив», – кунни Дагъусттаннал БакIчинал.
Ххал бигьлагьисса масъалалул хIакъираву махъ лавхъунни ДР-лул экономикалул ва территориярттал лябуккулул министр Руслан Аьлиевлул. Мунал бусаврийну, экономика ва социал ара лядуккан даврил ца чара бакъа аьркинсса ярагъну хъанай бур республикалул инвестициярттал программа. Министрнал бувсунни 2021-ку шинал му программа бартдигьинну циксса арцу итадаркьуну диркIссарив, миннух циксса объекру бувссарив, ххуллурду бакьин бувссарив, ламурду бувссарив, школартту бакьин бувссарив, цачIусса бюджетравун циксса даходру дучIан дур­ссарив.
ДР-лул шяраваллил хозяйствалул аралуву дурсса давурттая бувсунни ДР-лул шяраваллил хозяйствалул ва бакIлахъиялул миистрнал цалчинма хъиривчу Шарип Шариповлул. Масъалалул хIакъираву ихтилатру бунни мукунма цаппара профилсса министерстварттал ва идарарттал каялувчитурал.
Масъала ххал бигьаврил хIа­силлу дуллалисса махъ лавхъунни Дагъусттаннал БакIчинал.