«Турбарду бур, амма вайннуву газ бакъар»

ДР-лул энергетикалул ва ЖКХ-лул министрнал буржру чIумуйну биттур буллалисса Ризван Мурадовлул каялувшиндарай хьунни «Дирекция единого государственного заказчика-застройщика» идаралул ва «Газпром» ПАО-лул структурардал подразделениярттал вакилтуращалсса совещание.

Ваний ххал бивгьунни демографиялул национал проектрал лагрулий социал объектирттайн, республикалул кIантту-кIанттурдайн газ буцаврил, ва даву анавар дуккан даврил масъалартту.
Цалва ихтилатраву Ризван Мурадовлул кIицI лавгунни газификация агьалинал оьрмулул даража, хаснува архсса шяраваллал агьалиналсса, лавай баврил ца агьаммур шартI душиву.
– Газификациялул бущи анавар баврил масъала багьайсса даражалийн лахъан баву Президентнал цалва тIалав бувунни. Амма ши­кку ца дайшишруну хъанай дур газрал ххуллул системалул цаппара­сса участокирттай тархъансса мощность дакъашиву. Республикалий 25 газораспределительный станция бур зун аьркинссаннуяр ххину зузисса. Турбарду бур, амма вайннуву газ бакъар, – увкунни Ризван Мурадовлул.
ДР-лул БакIчи Сергей Меликовлул «Газпром» ПАО-лул Правлениялул председательнал хъиривчув Виталий Маркеловлущал архIал хIукму бувну бур «Газпром» ПАО-лул каялувшиндарайн бу­ккан, газораспределительный станциярттал модернизация ва реконструкция ккаккан дурсса чIумуяр хьхьичI щаллу даву чара бакъа аьркинну душиву тIалав буллай.
БатIаврил хIасиллайн бувну цаппарасса хIукмурду кьамул бувунни.