Ватан дуруччайминнал кьинилун хасну Москавлив, Цезар Куниковлул цIанийсса майданнив, Щалвагу Аьрасатнал хьхьирил бахьттагьалтрал «Тайфун» тIисса жяматийсса идаралул ветерантурал Дагъусттаннал Постпредствалущал уртакьну дунни Ккавкказуллахлусса талатаврин 80 шин шаврин хас дурсса мероприятие.

Ва акциялий гьурттушинна дунни 1-мур ранграл капитан, Авгъаннал аьрали иширттал ветеран, профессор, Москавливсса «Дагъусттан» Культуралул центрданул вице-президент ХIусман-ХIажи Аьлиевлул.
Мероприятие къуртал хьуну махъ Дагъусттаннал Постпредствалий ва хьунаавкьунни жагьилтуращал.
– Хъунмасса пахру бикIай, жула бюхттулсса лаккучувнал хIурмат чIалай, хаснува аьралитурал дянив ХIажи Сулаймановичлух личIиссара къулагъас дикIай. Ванал Дагъусттаннал иширттайн дагьайсса цурда-ца ккалли дувансса мероприятиягу лях гьан къаритайссар, – увкунни кIицI лавгсса Центрданул вице-президент БатIи Оьмаровал.
Жугу, хIалу дагьну дунура, жула «Илчилулгу» муданасса дус-ихтивар ХIажи Сулаймановлун чIа тIий буру чIярусса цIуллусса шинну, цIу-цIусса ххуй-хъиншивуртту!