Дагъусттаннал БакIчи Сергей Меликовлул Аьрасатнал Пре­зидент Владимир Путиннул Донбассрай аьрали ишру байби­шаврицIун дархIусса баян баву дунни.

– Билаятрал хъунаманал тIайлану бувсса хIукмур тIий ура. Жунма къакьамулну бия Киеврал режимрал чIярусса шиннардил мутталий Донецкаллал ва Луганскаллал республикарттай буллалисса ябацIу, зулмулул дазу дуван аьркин­ссар та-дунугу. Агьалинан вай республикарттай паракьатну яхъанан ччай бур, вас-ццах бакъа. Аьрасатнал ка-кумаг бакъа миннаща мукун къюву­сса тагьарданува буккан хъанай бакъая. Жунма Украиннал ва украин инсантурал ихтиярду ссуссукьу дуван ччай ба­къар, амма жунна жулла мюхчаншиву дуруччин аьркинну бия. МаслихIатрайну цалийн бучIан шайсса иш бакъая. Билаятрал бакIчинал тIийкун, тинмайну бавцIуну хъанахъимуних ялугьлангу бучIину бакъая. На дакI дарцIуну ура, уссурвал­сса билаятрай дакьаву дикIаву мурадрай, Аьрасатнал цалва биялалиймур бувантIишиврий ва букъавну чара бакъашиврий. Аьркин­ссаксса ярагъ жу­чIава бу­ссар, ватан дуруччин хIадурсса, чувшиву дусса аслийсса патриотътал буссар. Да­гъусттаннай оьр­му цила низамрай най бу­ссар. ЦукунчIавсса аваза къабуллай, паракьатну зузияра зула-зула иширттаха, – укун тIий ур Сергей Меликов Дагъусттаннал БакIчинал сайтрайсса видеообращениялий.