Дагъусттаннал Гуманитар институтраву февраль зурул 7-нний тIивтIунни электрон журалий ва дистанцион кьяйдалий лахьхьин буллалисса центр. Мероприятиялий гьуртту хьунни республикалул цифрардал лябуккулул министрнал буржру чIумуйну биттур буллалисса Тамирлан Бугъанов ва национал политикалул ва динийсса иширттал министрнал буржру чIумуйну биттур буллалисса Энрик Муслимов. Мероприятие дачин дурну ия Давуд Тумалаев.

Видеоконференциялул кьяйдалий гьуртту хьунни кьатIаллил билаятирттаясса аьлимтал-динчиталгу : Иракьнавасса щайх Маъмун Шяъбан Халил Ар-Равий, шариаьтрал элмурдал доктор, щайх МахIмуд АхIмад аль-Мисрий ва МухIаммад Идавсил( с.аь.с) наслулиясса щайх ХIабиб ХIусайн ас-Сакаф. Видеосвязьрайн бувккунни аьрасатнал вузирдал вакилталгу: Къазаннайсса исламрал институтрал ректор Рафик Мухатмешин, Москавливсса РАН-далул востоковедениялул институтрал элмийсса сотрудник Шамил Кашаф ва цаймигу.
БавтIцири барча буллалисса махъ лахълай, ДГИ-лул ректор НухIкьади БахIмудкьадиевлул кIицI лавгунни цIуну тIивтIу­сса Центрдания мюнпат бикIантIишиву Дагъусттаннал кьатIув зузисса ва мудан сессиялийн бучIан къахъанахъисса студентътуран. Энрик Муслимовлулгу чIурчIав дунни цIусса Центр чIумул тIалавшиннардацIун бавкьуну зунтIисса идарану бушиву, цIанакул дистанцион технологиярттал кумаграцIух лахьхьин буллалаву цIакь хъанай душиву, хаснува пандемиялул ппурттуву.

Вара даврил агьамшиврия бия Тамирлан Бугъановлулмур ихтилатгу. «ХIакьину информацион мюхчаншиврул пишакартал, программистал биял хъанай бакъар, чара бакъа му даврил мухIлу-хIин ххуйну кIулсса пишакартал хIадур буллан багьлай бур. Дистанцион журалул лахьхьин баву мушакъатсса инсантурангу аьркинну дия»,– увкунни ванал. Ахирданий магистратура къуртал бувминнан буллунни дипломру. Тамирлан Бугъановлул магистрнал диплом буллунни Ккуллал райондалул имам МухIаммад-Маннар Бариевлунгу.