Февральданул 15-нний ДР-лул БакIчинал ва ХIукуматрал Администрациялул Каялувчи Алексей ХIасановлул председательшиврий ххал бивгьунни Региондалул управлениялул центрданул январьданул 20-нния февральданул 15-ннийнин ашкара бувсса захIматсса масъалартту ва ми дузал бувансса чаранну.
Алексей ХIасановлул тIимунийну, агьалинаяту нанисса информация хъанай бур региондалул исполнител властьрал органнал дузал бувансса агьамсса масъалану. Му бур агьалинащалсса дахIаврил ца агьамсса ххуллу (канал), мунияту къабучIину бур инсантурал тавакъюрду ва аьрзарду къулагъас къадурну кьабитлан.
«Аьмну лавсун жуйвасса масъала хъанахъиссар агьалинащалсса дахIаврил ххуллурду мюнпатну зузи буван, цанчирча агьали ялугьлай буну тIий жура дувансса давурттал хIасиллах. Гьарца чулийн буккан къабувсса масъала – му хъанахъиссар министерстварттал, идарарттал ва муниципалитетирттал давурттал щаллу дакъашиву», – кунни Алексей ХIасановлул.
Дагъусттаннал ЦУР-данул каялувчи МахIаммадсултан Аьбдулаьлимовлул бусаврийну, кIицI дурсса мутталий ЦУР-данийн бувкIун бур 4 азарунниха ливчусса инсантураясса чагъарду, миннувату чIявуми бур чани лещан буллалаврил, экологиялул, дуккаврил, цIуллушиву дуруччаврил масъалартту.
Аьбдулаьлимовлул бувсунни мукунма цуми районнай ва шагьрурдай халкь рязи бакъа буссарив ми масъалартту дузал къабуллалаврия.
Алексей ХIасановлул бувсунни инсантурая лабизавуртту ларсун махъ, 2 ссятрал дянив, миннуйнсса жавабру дуллан аьркиншиву, лахъи дуккан къадурну.
БатIаврй ххал бивгьунни мукунма шяраваллил кIанттурдай духтуртал биял хъанай бакъашиврул масъалагу.
