Бутта МахIаммадов кьамул увунни «Химки» клубравун.
Дагъусттаннал 24 шинавусса футболист Бутта МахIаммадов чIявучин кIулну ур «Сатурн», «Знамя труда», «Чайка» тIисса футболлал клубирттахлу уклакаврийну. Махъсса ппурттуву лаккучув уклай ивкIссар Владиккавкказуллал «Алания» клубрахлу ва муниву МахIаммадов гьуртту хIуссар 24 тIуркIулуву, бавкьуссар шанма гол, мунал буллуссар 6 гол бакьинсса ттупругу.
ХIажинал арс Бутта МахIаммадов увну ур 1997-ку шинал МахIачкъалалив, нину-ппу Хьурттал шяраватусса бур. ОьрчIал 6 шин хьусса чIумал миннал кулпат бивзун бур Москавлив, Раменскалий айивхьуну ур футболданухун машхул хъанай.
Бутта уклай ур полузащитникнал кIанай. Гьуртту хьуну ур лаваймур даражалул кIива тIуркIулуву. Циняв турнирдай гьуртту хьуну ур 198 тIуркIулуву ва бавкьуну бур 34 ттуп.
