Шагьрурдай хьуннав, шяраваллаву хьуннав, махъсса кIира шинал дянив жула ялун дирсса кIул дакъа цIуцIаврищалсса талатаву найнна дур. Ккуллал райондалий цIана ци тагьар дурив, ларгсса шинал цукунсса давуртту дуван бювхъуну бурив цIуххаву дуван, на хьунаавкьура райондалул азарханалул хъунама хIакин, Гьаруннул арс Щамхалов КьурбанмахIаммадлущал.

• – КьурбанмахIаммад, най дунура янилун дагьлай дур азарханалул хIаят ххуй хьуну душиву…

– Дуллай дайдирхьуну диркIсса гьанусса ремонт къуртал дуван бювхъунни азарханалул терапиялул отделениялий. Шикку дузал дурну дуссар шагьрулий куннасса шартIру. Укуннасса ремонт дуван бювхъунни административно-хозяйственный корпусравугу. Шикку ремонт дурссар: физ.кабинетрал, УЗД-лул кабинетрал, бакьин бувссар халкь батIайсса зал, аптекалул склад, бухгалтерия, анаварсса медициналул кумаграл къатри. Гъарал, марххала буний поликлиникалучIан гьан-бучIан захIматну бикIайва. Вана утти исвагьисса плиткарду даркьусса ххуллурду бувну. Азарханалувун буххайсса дарвазагу, чапаргу цIусса дуварду, ши­ккун нанисса кьатIухсса ххуллурдайхгу асфальт бавкьуссар. Ва асфальт бакьаврицIун ка-кумаг бунни райондалул бакIчи Шамил Рамазановлул. Жу дуллалисса давурттугу хIисавравун ларсун, Министерствалул буллунни шанма машина: УАЗ — Патриот -1, УАЗ – Анаварсса кумаграл машина, В – Ларгус. Ларсъссар медициналул оборудование: электрохирургиялул аппарат, ряхра ва ацIния кIира канал дусса электрокардиографру, дефибриллятор, гематологиялул анализатор МГО-1 ва мукунма цаймигу.

• – Утти жула цинявннал дакIнийнувасса, буру­ккин ялттусса суал: цукунсса тагьар дур ковидрал ва муницIунсса вакцинациялул?

– Райондалул агьали махъсса пурттуву чялишну буллан бивкIунни вакцина. Прививкартту дуллай бур учительтал, медициналул, администрациярттал, социал идарарттал зузалт ва цаймигу. Вакцина ябуван аьркинсса шартIругу азарханалий дузал дурну дуссар. Къашайшалт чан хъанай бакъахьувкун, ларгсса щала шинал жучIа зий бивкIссар «ятIул зона». Вакцинартту буллай байбивхьуру дукIу, март зуруя шихунмай. ХIакьинусса кьинигу «ятIул зоналий» къашайшалт кьамул буван бюхъайсса 20 тах буссар. Микку цIана 18 къашайшала ур. ЦIуну бакьин бувсса терапиялул отделениялийгу хIадур бувну бур 15 тах. Къашайшалтран аьркинсса дарув-дарманнугу дузалну бур. КIива зурул луртан дуссар. Цинявннан чIалай бур уттигу ва цIуцIаву жуятура арх хъанан дурашиву. Ялун бивунни «Омикрон» тIисса цамур журагу. Ва цахъис бигьасса дур. Амма чIявуссаннайн анаварну диллалисса цIуцIаву дур.
Ларгсса шин бигьасса къархьунни жул коллективран. Яла лавгунни ххаллилсса, пагьму бу­сса кIия хIакин: Кьубатаев Аьли ва Абакарова Мааьзат. Аьпа буваннав цал.
«Земский доктор» программалийн бувну кьамул уварду шама хIакин: Кьубатаева Аня (хъаннил хIакин), Камилова Мааьзат (терапевт), Аьбдуллаева Диана (оьрчIал хIакин).

• – КьурбанмахIаммад, райондалул азарханалул даража къаоьккир, шяраваллавусса ФАП-ирдал иш-тагьар цукун­сса дур?

– Гьашину буллай байбивхьуну буссар СунбатIлив ва 1-мур ЦIувкIрав ФАП-ру. Умуд бур гьашину къуртал буван хьунссар тIисса. Ккуллал шяравусса азарханалул къатри гьануцIакул дакьин дуван пландалий дуссар. Пикри бур Вихьуллал шяравусса амбулаториялул къатригу дакьин дувансса.

• – Жула ихтилатрал ахирданий ина ци учинна райондалул жяматрахь?

– Аьлтта чIалай, ва бала-хатIасса цIуцIаву дурар уттигу ялату гьан. Аьмну Аьрасатнаву ца кьини ялун личлай бур 200-азарунния ливчусса къашайшалт. Мунийн бувну, на жула агьалинахь тавакъю буллай ура, ва хъинну захIматсса чIумал, Роспотребнадзорданул бувсса маслихIатругу бурувччуну, му­гъаятну бикIияра, зула зува бурувччуну яхъанахъияра тIий.