Февральданул 2-нний «Минводы Экспо» выставкардал центрданий байбивхьунни «АгроКавказ 2020» тIисса аграрий форум.
Дагъусттан Республикалул чулухату форумрай гьурттугу хьуну, махъгу лавхъунни ДР-лул шяраваллил хозяйствалул министрнал цалчинма хъиривчу Шарип Шариповлул. Мунал докладран цIа дия «Дагъусттаннал ва аьмну СКФО-рай ризкьи ябаврил лябуккулуву фермертурал хозяйстварттал бугьлагьисса кIану».
Шарип Шариповлул тIимунийн бувну, Росстатрал ккаккиярттайну 2020-ку шинал Дагъусттаннай фермертурал хозяйстварттал ларсун дур 13 млрд къуруширттансса ризкьилул сурсатру, му хъанахъиссар АьФ-лий яла хъинмур ккаккия.
Дагъусттаннай аьмну ларсъсса бакIлахъиялул фермертурал ларсмур бутIул 84,7% хъанай бур рикьилия ларсмур,15,3% – ххяххиялул бакIлахъия. 2021-ку шинал хьусса Щалвагу Аьрасатнал шяраваллил хозяйствалул переписрал ккаккиярттайн бувну, Дагъусттаннай дур 3873 фермертурал хозяйство, ягу жула республикалул бугьлай бур му чулуха билаятрай 2-мур кIану.
Дагъусттаннал фермертурал хозяйстварттаву бур 2 млн ва 215 азарва бакI яттил, ягу билаятрай буми яттил 26%, СКФО-рай буминнул 52%. СКФО-рал регионнал дянив Дагъусттан бур мукунма цалчинмур ххуттай хъуни гъаттара ябаврил чулуха, Республикалул фермертурал хозяйстварттаву бур 122 азарва бакI хъуни гъаттарал.
2020-ку шинал республикалул фермертурал ларсун дур 18,5 азарда тонна яттил дикIул. Му хъанахъиссар жула билаятрай яла хъинмур ккаккия.
Ихтилатрал ахирданий Шарип Шариповлул бусунни Дагъусттаннал АПК-лух хъуннасса къулагъас дуллай бушиву Аьрасатнал Минсельхозрал.
