Авгъаннал ветерантурансса къатри

Февральданул 15-нний ДР-лул ХIукуматрал Председательнал буржру бартбигьлагьима Аьбдулмуслим Аьбдулмуслимов хьунаавкьунни Авгъаннал дяъвилул ветерантуращал.

Ва кьини кIицI дайссар Ватандалул кьатIув къуллугърал бурж бартбигьлай бивкIминнал Аьпалул кьинину. Гьашину 33 шин хьуссар совет аьрал Авгъаннавату буккан бувну.
Хьунабакьаврий гьуртту хьуминнал хьхьичI аьла-ссалам буллалисса махъру лавхъунни ДР-лул ХIукуматрал Председательнал хъиривчувнал буржру бартбигьлагьима Рамазан Жяъпаровлул ва Аьбдулмуслим Аьбдулмуслимовлул.
Аьбдулмуслимовлул тIиму­нийну, Сергей Меликов ДР-лул БакIчину зун ивкIния махъ Авгъаннал дяъвилул ветерантурахсса къулагъас хъун дуллай бур. Авгъаннал ветерантал къатрал дузал баврил масъала чулийн буккан баву мурадрай, ДР-лул БакIчинал тапшурлугърайну, 2021-ку шинал, республикалул бюджетравату цалчин ккаккан дурну диркIссар личIи дуван 110 млн къурушру. Мигу, миннуяр хьхьичI ккаккан дурну диркIмигу хIалану, цинярда хьуну диркIссар 223.2 млн къурушру.
ХьхьичIми шиннардий дянивну 60-70 къатри ласунсса свидетельствартту дулайсса диркIхьурча, дукIу дуллуну дур 194.
Гьашину республикалул бюджетраву дяъвилул ветерантал къатрал дузал баву мурадрай, миннавух авгъаннал дяъвилулссагу, ккаккан дурну дур сайки 420 млн къурушру. Миннух бюхъантIий бур къатрал дузал уван авгъаннал дяъвилул 249 ветеран.
Му бакъассагу, Авгъаннал аьрщарай най бивкIсса дяъвилий ливтIусса аьралитурал кулпатирттан оьрмулухун гьар зурух дулайсса 2000 къурушран кIанай утти дулайссар 10 000.
Хьунабакьаврий махъру лавхъунни мукунма «Авгъанисттаннал Ветерантурал Аьрасатнал союз» тIисса жяматийсса сакиншиндарал республикалулмур идаралул каялувчи МахIаммад Хадулаевлул ва «Авгъанисттаннал Ветерантурал Дагъусттаннал союз» тIисса республикалул жяматийсса сакиншиндарал председатель Нажмуттин Акаевлул.
Аьбдулмуслим Аьбдулмуслимовлул бакIрайн лавсунни батIаврий гьаз бувсса масъалартту дузал буван.