Бувсунни ДР-лул ХIукуматрал давурттал агьамми ххуллурдая

Бувсунни ДР-лул ХIукуматрал давурттал агьамми ххуллурдая

Абдулмуслим Абдулмуслимов

Февральданул 22-нний ДР-лул Халкьуннал Мажлисрал депутатътурал кабакьу бунни Республикалул ХIукуматрал Председательнал къуллугърайн цIа дирхьуну диркIсса Аьбдулмуслим Аьбдулмуслимовлул кандидатуралуцIун. Сессиялий Аьбдулмуслимовлул бувсунни министртурал кабинетрал бартбигьин аьркинсса агьамми масъаларттая.

Дагъусттаннал Лябу­ккулул программа

Аьбдулмуслим Аьбдулмуслимовлул тIимунийну, Дагъус­ттан Республикалий дур хъуни­сса лябуккулул каширду. Махъсса шиннардий дурунни таман­сса давуртту, амма ттигу чIярусса дуван дур.
«Мунийн бувну, Дагъусттаннал Лябуккулул программа сакин дурну дур АьФ-лул 2030-ку шинайннинсса лябуккулул мурадрайсса яла агьаммину хъанахъисса 5 гьанулий. Мукунмину хъанай бур инсантурал цIуллушиву ва ахIвал-хIал хъин баву, миннал пагьму-гьунарду итххяххан баву, оьрмулунсса шартIру ххуй-хъин даву, лайкьсса ва мюнпатсса захIмат ва ишбажаранчишиву, цифралул трансформация».

ЦIуллушиву дуруччаву

ХIукуматрал даврил ца яла агьаммур ххуллу-ххану хъанай бур, премьер-министрнал кIанайманал тIимунийну, да­гъусттанлувтуран къулайшивуртту дусса шартIру дузал даву, миннал цIуллушиву ва мюхчаншиву дуруччаву.
«Жува аьркинссар лябуккан буллан цIуллушиву дуруччаврил масъалартту. Цуксса жува хIарачат булларчагу, жува ма­хъун багьну буру Аьрасатнал дянивсса ккаккиярттаяр цаппара кIанттурдаву. Мунийн бувну, жунма аьркинну бур медициналул кумаг инсантурачIан гъан буван, му ххуй буван, инсантал литIаву чан дуван.

Дуккаву лядуккан даву

Аьбдулмуслим Аьбдулмуслимовлул тIимунийну, социал аралуву уттигу ца агьамсса ма­съала хъанай бур дуккаву ляду­ккан даву.
«Му аралувусса масъалартту жунма бувчIлай бур – му дур садик-яслирдай цинявннансса кIанттурду дузал баву, школар­ттай шанна смена духлаган даву ва оьрчI-бакI гъилисса дукралул щаллу баву.

Национал проектру бартдигьаву

Лавай кIицI бувсса масъалартту дузал бавриву хъунма­сса кIану бугьлай бур национал проектру дузрайн дуккан даврицIунсса давурттал.
2021-ку шинал республика гьуртту хьуну дур 12 наци­онал проект бартдигьавриву. Миннул лагрулий буллай бивкIссар школартту ва оьрчIал садикру. Национал проектру ва паччахIлугърал проектру бартдигьаврил лагрулий республикалий гьарца кIанттурдай буллай бур социал ва инженер инфраструктуралул объектру. Махъсса шиннардий бювхъунни ми объектру буллансса арцу гьарзану итадакьлан.

Ччуччиялул ва энергетикалул комплекс лябуккан баву

ХIакьинусса кьини республикалул ХIукуматрал ва «Газпром» ПАО-лул хIадур дурну дур цачIусса давурттал план. Муний ккаккан бувну бур республикалул гьарца шяравун газ буцин.
Газификациялул масъала­луцIун бавхIуну бур Дагъусттан электричествалул дузал баврил масъалагу. Мунияту «Россетти» ПАО-лул хIадур дурну дур «Повышение надежности электросетевого комплекса республики» тIисса программалул проект. Мунил багьа бур 7,6 млрд къурушру.
Аьбдулмуслим Аьбдулмуслимовлул мукунма бувсунни экологиялул ва ЖКХ-лул масъаларттал, транспортрал инфраструктуралул, ДР-лул социал-экономикалул лябуккулул стратегиялул, инвестицияртту дучIан даврил, АПК лябуккан баврил хIакъираву дуллансса давурттая.

Читайте также: