Ватан дуруччултрал кьини хъаннилгу байранни

Ватан дуруччултрал кьини хъаннилгу байранни

Ватан дуруччултрал кьини, чиваркIуннал дакъассагу, аьрали къуллугъ буллалисса цинявппагу хъаннилгу байранни. Мукунминнавасса бур ЦIуссалакрал райондалийсса ЦIуссаккуллал шяравасса Альбина Къаплановагу.

АцIния ххюнния лирчусса шинну дур ванил аьрали частьраву къуллугъ буллай. Каспийскаллал медициналул училищагу къуртал бувну, 1998- ку шинал ва бувкIун бур зун ЦIуссалакрал райондалул азарханалийн. Таний Альбинан пикривагу бакъахьунссия, кIяла хялатран кIанай, аьрали яннагу ларххун, аьрали фельдшерну зунсса. Ва щар хьуну бур аьраличувнан, ласналгу Альбинахь цува къуллугъ буллалисса кIанттурдай зун маслихIат бувну бур.
2006-2019- ку шиннардий ва зий бивкIун бур Чачаннаву, Шали шагьрулий, аьрали фельдшерну. 2019-ку шиная хIакьинусса кьининин Альбина къуллугъ буллай бур Каспийскаллал флотилиялул хьхьирил бахьттагьалтрал шамилчинмур батальондалуву. Ва бур медициналул къуллугърал прапорщик. ЧIирисса чIумул дянив Альбина лайкь хьуну бур чIярусса наградарттан. Миннувух дур ДР-лул МВД-лул чулухасса «Участник контртеррористических операций на Кавказе» медаль, «За мужество и отвагу, проявленные при выполнении воинского долга» Суворовлул медаль. Ва медаль Альбинан дуллуну дур 2015- ку шинал Кремлилуву, таний Аьрасатнал виваллил иширттал министрну ивкIсса Сергей Шойгул. Вай дакъассагу, Альбинал дур чIярусса грамотартту ва барчаллагьрал чагъарду. Ванил хIурмат бур архIал зузиминначIа.
Альбинал бур 2 оьрчI. Арснан Шихшан нитти-буттал ххуллийх гьансса пикри бур. Ва увххун ур Аьрасатнал Юстициялул министерствалул Правовой академиялул Ухссавнил Ккавкказуллал институтравун. Душнин Дианан школа къуртал бувну махъ хIакин хьунсса пикри бур. ТIайлабацIу баннав.

Аватар

Андриана Абдуллаева

Андриана Абдуллаева

Читайте также: