Дагъусттаннал Росгвардиялул управлениялул зузалт ва аьралитал гьуртту хьунни «Ленточка памяти» тIисса патриот акциялий. Акция хьунни МахIачкъалалив, Ленинский комсомолданул цIанийсса паркраву.

Ванил сакиншинначитал хьунни «Волонтеры Победы» тIисса щалагу Аьрасатнал жяматийсса суккушинна, Миллат­рал политикалул ва Жагьилтурал министерствартту. Мероприятиялий гьуртту хьунни Аьрасатнал Виричув Загьид Загьидов, Да­гъусттаннал Халкьуннал Мажлисрал председатель Заур Аскендеров, ДР-лул ХIукуматрал председательнал хъиривчув Муслим Телякавов, МахIачкъалаллал бакIчи Салман Дадаев, республикалул жагьилтурал ва ветерантурал организациярдал вакилтал.
Мероприятиялул гьурттучитурал тIутIив дирхьунни Аьра­личувнал гьайкалдануцI, Ватан дуручлай жанну дуллуминнал аьпа­лун баян бунни минутIрайсса пахъ багьаву.
Цала ихтилатраву Загьид Загьидовлул кIицI лавгунни Хъунмасса Буттал кIанттул цIанийсса дяъвилий жанну дуллусса вир­ттал дакIний битаву жула цинявннал бурж бушиву.
Укуннасса мероприятияртту хьунни Каспийскаллал ОМОН-лул базалийгу. «Ястреб-Каспий» СОБР-ал ва «Скорпион-Ка­пий» ОМОН-лул зузалтрал дакIнийн бивчунни къуллугърал бурж бартбигьлай жанну дуллусса цала дустал. Аьдатравун багьсса куццуй, вайннал тIутIив дирхьунни Ярославуллал ОМОН-лул аьралитал-прапорщиктал Игорь Серовлунсса, Сергей Сниткиннунсса ва Александр Селезневлунсса гьайкалдануцIгу.
Вайннал жанну дуллуссар 1999 шинал Къарамащилий ва Чабанмащилий къачагътуращалсса талатавурттаву.