Февраль зурул 11-нний МахIачкъалалив Национал библиотекалуву хьунни Авгъанисттаннава аьрал буккан бувсса кьинилун хас бувсса форум. Мероприятие сакин дурну дия «Союз женщин Дагестана» региондалийсса жяматийсса идаралул ва Миллатирттал политикалул ва диндалул иширттал министерствалул, ДР-лул Ппухълуннал советрал, «Офицеры России» тIисса региондалул организациялул отделениялул чIарав бацIаврийну.

Шикку гьуртту хьунни ДР-лул миллатирттал политикалул ва диндалул иширттал министр Энрик Муслимов, Хъаннил союзрал председатель Интизар Мамутаева, ДР-лул оьрчIал ихтиярдал ялувсса вакил Марина Ежова, Авгъан ветерантурал союзрал председатель МахIаммад Хадулаев, Дяъвилул ветерантурал советрал председатель МахIаммад Аьлиджанов ва м. ц.
Форумрал даву дачин дурну бия Интизар Мамутаева. Ихтилатраву ванил кIицI лавгуна ва кьини жула республикалул агьалинан хъуннасса агьамшиву дусса кьинину хъанахъишиву. Ванил дакIнийн бувтуна, чIярусса шиннардий Дунияллул халкьуннал дакьаву дуруччаврил комитетрай каялувшиву дуллай, жяматийсса давурттаха зий бивкIсса, бусалдаравун багьсса Фазу Аьлиева. Мукунма бувсуна ларгсса шинал Хъаннил союзрал дурсса даврил хIасиллая ва 2022-ку шинал дан дакIниймуния.
– Гьашину республикалий кIицI лаглай бур Фазу Аьлиевал 90 шинал юбилей. Дуссар, Хъаннил союзрал сипталийн бувну, Фазу Аьлие­вал аьпа абад баву мурадрай дантIисса личIи-личIисса мероприятияртту. Миннува мукьра ларсун дуссар республикалул даражалий кIицI лагантIиминнул сияхIрайн, – увкунни Интизар Мамутаевал.
Хъирив ихтилат бувсса Энрик Муслимовлул барчаллагь увкунни форум бан сиптачину бувксса Хъаннил союзрахь.
– ЛичIи-личIисса бур Авгъаннавун аьрал бакьаврил хIа­къиравусса пикрирду. Ци бухьурчангу, та дяъвилул иширттаву гьуртту хьусса жагьилтурал аьрали бурж лайкьну биттур бувссар, – увкунни Энрик Муслимовлул.
Авгъан дяъвилул иширттаву жула жагьилтурал аьрали бурж биттур баврия ихтилатру бунни мукунма Марина Ежовал, Шамсият Насруллаевал, МахIаммад Хадулаевлул, МахIарам Аьлиджановлул ва м. ц.
ДакIнийн бутанну Авгъанис­ттаннаву 1979-ку шинал декабрь зурул 27-нния 1989-ку шинал февраль зурул 15-ннийн бияннин (9 шин, 1 барз ва 18 гьантлий, яни 2238 кьини) дяъви най бивкIшиву. Та дяъвилия зана къавхьуссар 14 азарунния ливчусса жула жагьилтал. Та дяъвилул цIараву талай ивкIссар 2958 дагъусттанлув.