Февраль зурул 15-нний, аьдатравун багьсса куццуй, Ма­хIачкъалалив хьунни чил билаятирттай интернационал бурж лахълай жанну дуллусса аьралитал дакIнийн бичлачисса мероприятие. Авгъан дяъвилул ветерантурал ва мефроприятиялул гьурттучитурал тIутIив дирхьунни Авгъаннал аьрщарай жанну дуллусса аьралитурансса гьайкалдануцI.

Гьашину 33 шин хъана­хъиссар совет аьрал Авгъаннава буккан бувну. Ва иширацIун дархIусса мероприятияртту гьашину, хьхьичIсса шиннардий кунна, гьарта-гьарзану къадунни цIана региондалийсса тагьар хIисавравун ларсун.
МахIачкъалаливсса Ветерантурал советрал председатель Аьлисултан Аьлисултановлул ливтIуминнал аьпалун баян бунни минутрайсса пахъ багьаву.
– Ва пашмансса асардал видурцIусса кьини дур. ВаницIун, цала аьрали дустуращал хьунабакьин ва аьпалухьхьун лавгми дакIнийн бичин шиккун бучIайсса авгъан дяъвилул ветеранталгу ялу-ялун чан хъанай бур.ЧIявуминнал цIуллу-сагъшиврул тагьар ххуйну дакъар, цаппарасса дунияллия лавгунни. ЧIумул щавурду хъин дайссар учай. Цими шин гьарчагу, ттун тай дяъвилул кьинирду хъама къаритай, – увкунни авгъан дяъвилул ветеран АхIмад Идрисовлул.
Митинг къуртал хьуну махъ цинявппа лавгунни Каспийскалийн, «авгъанцынан» хас дурсса дзюдорал Дагъусттаннал чемпионатрайн.
1989-ку шинал февраль зурул 15-нний Авгъаннал аьрщарая дуркссар махъра-махъсса совет аьралуннал колонна. Авгъаннал аьрщарайсса дяъви лахъи лавгссар 9 шинай. Та дяъвилий жанну дуллуссар 15 азарунния ливчусса совет инсантурал. 2010-ку шиная шихуннай официальнайну цIакь хьуссар Интернационалис­тал дакIнийн бичайсса кьини.