Январь зурул 27-нний «Жизнь без слез» тIисса ДРООПИ-лул (Дагестанская региональная общественная организация помощи инвалидам») Дяхтта оьрчIах буругайсса къатлуву цIусса «Самостоятельная жизнь» тIисса отделение тIитIлатIисса мажлис хьунни.
Центрданул цIусса отделениялий бикIан тIий бур аькьлу-кIулшилул махъун багьсса ва цIуллу-сагъшиврул ссуссукьусса, оьрмулул 14 шиная лавайсса оьрчIру-душру.
КIицI лаган, «Жизнь без слез» организация сакин хьуссар 2006-ку шинал август зуруй укунсса мушакъатшиву дусса оьрчIал нитти-буттал сипталий. Мунияр махъ, 2009-ку шинал сентябрь зуруй, зун байбивхьуссар Дяхтта оьрчIах буругайсса къатта (Дом дневного пребывания). ХIакьинусса кьини щалагу Центрданий 180-ннийн бивсса оьрчIру-душру бур, цIуну тIиртIусса отделениялий бур 40 оьрчI.
ОьрчIал оьрму бигьа баву, ххуй баву мурадрай, вайннан кIулшивуртту дуллай, цIуллу-сагъшиврул ялув бавцIуну зий бур личIи-личIисса пишакартал: психологтал, педагог-дефектологтал, логопедтал ва м.ц.
ОьрчIру бикIайссар шикку ссят 9.00-нния 15.30 хьуннин.
Нанисса шинал январь зуруйн бияннин вай къатри кIира зивулий буссия. Утти, шамилчинмур зиву дакьин дурну, тIиртIунни цIусса, цахъи хъуними оьрчIансса, отделение.
Отделение тIитIлай, цала Къатлуя, шиккусса оьрчIая, зузалтрая бусласисса ихтилат бунни Къатлул хъунмур Аьйшат ХIамзаевал. Хъирив нитти-буттан ва хъамаллуран ккаккан бунни отделениялийсса гьарица аьркинмунил дузалсса мюрщи мастерскойрду. Шикку оьрчIан лахьхьин буллай бур тIахIни дан, бисерданий щащан, дуруххан, майлул чирахъру бан, дукра дан, цала хъирив лакьин, компьютерданий зун.
Шиккун оьрчIру биян буллалисса нитти-буттал дакIнийхтунусса барчаллагь увкунни Аьйшат ХIамзаевахь ва шикку зузисса пишакартурахь цала оьрчIал цIаний бихьлахьисса хъунмасса захIматрахлу. Хъирив оьрчIал ккаккан дунни цала хIадур дурсса музыкалул программа.
