Дагъусттаннал БакIчи Сергей Меликов хьунаавкьунни республикалул ТОКС-рал каялувчитуращал. Шикку гьуртту хьунни ДР-лул кIулшивуртту дулаврил ва элмулул министрнан кIанайсса ЯхIия Бучаев, жагьилтурал иширттал министрнан кIанайсса Камил Саидов, ТОКС-рал командир МахIаммад НурасулмахIаммадов, «Дагестан» ГТРК-лул хъунаманал хъиривчув, ТОКС-рал штабрал хъунама Ссалам Хавчаев, ТОКС-рал командирнал хъиривчув, ОьрчIал ва чIава жагьилтурал туризмалул ва краеведениялул центрданул хъунама Арсен Хайбуллаев. Хьунабакьаврий ххал бивгьунни краеведческий кьюкьлул даву гихуннайгу хьхьичIуннай даврил, мукунма ялун нанисса ник ватан ххирану тарбия даврил масъалартту.
Сергей Меликовлул кIицI лавгунни ТОКС-рал дуллалисса багьа бищун къашайсса даву. Министртурал бувсунни краеведтурал-следопытътурал суккушинна хьхьичIуннай даву мурадрай цала дуллалисса давурттая. Отрядрал каялувчитуралгу бувсунни ялун нанисса дачIи шинал дянив цала дуллантIимуния. Вай давурттал хьхьичI ххуттай дур Авгъан дяъвилул гьурттучи, генерал — майор Оьмар Муртузялиевлун хас дурсса документал фильм. Цалчинсса ТОКС-рал кьюкьлул цалчинсса командир Совет Союзрал Виричув Николай Подорожный ивчIайхту, ва даврий каялувшиву дуллай ивкIссар Оьмар Муртузялиев.
«Героическая биография. Семья Муртузалиевых» проектраха зий дур «Дагъусттан» ГТРК. Ва щаллу хьунтIиссар февральданий.
ДакIнийн бутан, 1970-ку шинал Дагъусттаннай сакин хьусса ТОКС-рал суккушинна жула билаятрай цамур дакъассар. Ва суккушиннаравун духлахиссар Дагъусттаннал личIи-личIисса шагьрурдаясса ва районнаясса 110 поисковый кьюкьа.
