Зунттаву яхъанахъисса инсантурал хIакьину ца яла агьаммур маэшатну хIисав хъанай бур ятту-гъаттара ябаву. Кулпатран аьркинсса дуланмагъ миннуйну хъанай дур. Гьай-гьай, хъиннува бучIия, хъуругу дугьлай, цIурихьулувусса затру ххи дуллансса ишругу дузал буллай бивкIссания. Умуд бур мигу булланссар тIисса. Циван учирча, ттучаннайсса хъус, ялу-ялун ххира хъанарча дакъа, кьюкьлай дакъар, ми ласунсса арцулгу хъирив лаллай бакъар.

Ятту-гъаттарагу, инсантал кунма, цIуцIавурттая буруччиншиврул, Вихьуллал шяравусса ветучастокрал хъунама хIакин МахIаммадов Шяъваннул ва шяраваллил администрациялул бакIчи Сулайманов СайкIул цаннах цаннал вичIи дишаврил ххуллийсса хьунни цаппара давуртту. Ми давурттугу хьунни махъсса ца шинал мутталий.
Шяраву махъсса шиннардий дакъассия яттил «купка» дувайсса сакиншин. Дурунни «купка». Ятту-гъаттарайн инттухуннай, ссуттихуннай личIи-личIисса цIуцIавуртту къадияншиврул буван аьркинсса ххалаххив, оь ласун аьркинсса «раскол» дувунни ларгсса шинал гъинттул. Ва «раскол» явара тачIаврагу Вихьуллал шяраву дакъассия. Вана, утттигъанну, БакIух- РатIничIату арх дакъа, дурунни чапур хьусса ятту- гъаттара, ккаччи-ччитри буччайсса кIалан. Ва кIалангу уттинин шяраву диркIун дакъая. Ванийн оьрус мазрай «скотомогильник» тIий бур. Ччан бикIарча, гьай-гьай, шайсса дусса дур давуртту дуван. Барчаллагь вай давуртту дурминнайн.