Парламентрал депутатътал бавкьунни реформа даврил цIусса проектрацIун

Январьданул 18-нний хьунни Дагъусттаннал Халкьуннал Мажлисрал арулчинмур сессия. Ва бачин бувну ия парламентрал председатель Заур Аскандаров.

Сессиялий ххал бивгьусса масъаларттавасса ца яла агьаммурну бия «Жяматийсса властьрал цасса системалуву кIанттул цилакаялувшиврул сакиншиндарал аьмсса принципирттал хIакъираву» тIисса Федерал закондалул проект. («Об общих принципах организации местного самоуправления в единой системе публичной власти»).
Закондалул проектращал депутатътал кIул бунни ДР-лул ХМ-рал Законодательствалул, законшиврул, паччахIлугърал дузалшиндарал, кIанттул цилакаялувшиврул ва регламентрал комитетрал председатель Артур Исрапиловлул. Ванал бувсунни иширайну проект цукун зунтIиссарив.
БакIрайва Исрапиловлул чIалачIи бунни республикалул шяраваллу дукьан дуллалиссар тIисса хаварду щялмахъсса бушиву.
– Ва къатIайлассар. Царагу шяравалу дакъа къахьунтIиссар. Муниципалитетирттал гьанулий сакин хъанахъиссар муниципал округру, миннуву яла къадикIантIиссар цайрану цирда щурущисса шяраваллу. Микку хIасул хъанай бур укунсса суал: шяраваллавусса инсантурал масъалартту щилли дузал буллантIисса? Дукьан дурсса шяраваллан кIанай сакин бувантIиссар муниципал округрал администрациялул территориялул отдел, мунил бартбигьлантIиссар ми шяраваллал циняв масъалартту, – увкунни депутатнал.
Доклад буллалиманал тIиму­нийну, отделданул зузалт зунтIий бур цIанасса ппурттуву шяраваллал идарарттал зузалт зузисса къатраву. Ва ялагу, Исрапиловлул бувсунни щялусса бушиву зузалт чан буллан най бур тIисса хавардугу: «Миннаща бюхъантIиссар къуллугъ бартбигьлан территориярттал отделлаву».
КIанттул цилакаялувшиврул органнал шяраваллал жяматирттащалсса дахIаву сакин даншиврул увчIин тIий ур шяраваллил вакил-староста. Му увчIин тIий ур жяматрал батIаврий. Му икIантIиссар жяматрал чулухасса инсанну, ва мунал харжгу къаласлантIиссар. Старостанал давуну хъанахъиссар инсантурал муниципалитетирттащалсса дахIаву дуруччаву. Исрапиловлул ялагу бувсунни старостахъул бикIантIий бушиву хIакьину шяраваллал администрацияртту бакъасса мюрщисса шяраваллаву.
Му закондалул проектрал мукунна хъун дуллай дур АьФ-лул субъектрал бакIчинал хьхьичI муниципалитетрал бакIчинал жаваблувшиву. Региондалул каялувчинаща му чIумал бюхълай бур выговор баян буван муниципалитетрал бакIчинайн паччахIлугърал ихтиярду (полномочияртту) мюнпат бакъа ишла дуллалаврихлу. Агарда зурул мутталий давуртту махъун дагьаврил сававртту дукьан къадарча, субъектрал бакIчинаща бюхълай бур муниципалитетрал бакIчи къуллугърая укьан уван, мюнпатну зузаврил ккаккияртту дакъашиврийн бувну.
Ххал бигьлагьисса масъалалул хIакъираву ихтилатру бунни мукунма депутатътурал МахIаммад Патхулаевлул ва Султан Ибрагьимовлул.
ЧIурду буллуну, проектрацIун авкьунни 63 депутат, къарши увккунни 2, чIу булаврия махъунай хьунни 7 депутат.