«Дагъусттаннал щаращал» жюржулухун

МахIачкъалалив, Дагъусттаннал Художниктурал союзрал Выставкартту дувай залдануву, тIиртIунни декоратив-прикладной искусствалул «Родники Дагестана» тIисса цIанилусса выставка. Ва дурну дия Республикалул Культуралул министерствалул ва Халкьуннал творчествалул къатлул, ДР-лул Художниктурал союзрал гьурттушиннарайну.

Дагъусттаннал 29 райондалиясса ва шагьрулиясса 69 ус­ттарнал дурсса 500-нния лирчусса давуртту дия ккаккиялун дирхьуну.
Выставка тIитIлай, ихтилат бувна ДР-лул культуралул министр Зарема Буттаевал. Цилва ихтилатраву ванил кIицI лавгуна «Дагъусттаннал щаращив» выставкалийну жулла республикалий тIитIлатIишиву билаятрал Президентнал хIукмулийну баян бувсса Аьрасатнал халкьуннал Культуралул ирсирал шин. ЧIурчIав дурна ва шин Культуралул ирсирал шинну баян бувансса пикри хьушиврий халкьуннал искусство, чIяву миллатру бусса Аьрасатнал культуралул аваданшиву дуруччаву ва машгьур даву мурадрай, ва журалул хIукмурдал ляличIиссара мяъна душиврий личIи-личIисса халкь ялапар хъанахъисса жулла республикалунгу. Министрнал ца лишандалунсса иширан ккалли бувунни Аьрасатнал халкьуннал Культуралул ирсирал шин Дагъусттан Республикалул Халкьуннал творчествалул къатлун 85 шин хъанахъисса таварихращал тIайла дацIавугу. Шиккува министрнал Республикалул Халкьуннал творчествалул къатлул директор Марита МухIадовахьхьун буллунни Барчаллагьрал чагъар, ванил каялувшиннаралу щалвагу коллективрал халкьуннал культуралул ирс ябавриву буллалисса захIматран кьимат бишлай.

Выставка тIитIлатIисса шадлугърай мукунма махъру лавхъуна Марита МухIадовал, П. ХIамзатовал цIанийсса Да­гъусттаннал изобразительный искусствардал музейрал директор СалихIат ХIамзатовал, тарихрал элмурдал доктор Эльмира Далгатлул, ДР-лул Художниктурал союзрал председатель Кьурбанаьли МахIаммадовлул, ДР-лул Культуралул ирс буруччаврил агентствалул каялувчи МахIач Мусаевлул ва мукунма цайминналгу.