Аьдатравун дагьсса куццуй, Гъумук хьунни ЦIусса шинацIун дархIусса шадлугъру.
Миннувагу агьаммур – Елкалул шадлугъ хьунни Жагьилтурал паркраву, Лакрал райондалул бакIчи Юсуп МахIаммадов, идарарттал каялувчитал ва зузалт, шяраваллал бакIчиталгу гьурттуну.
БавтIми барча буллай, Юсуп МахIаммадовлул бувсунни яла нанисса шинал хIасиллая ва ялун нанисса шинаву дан дакIнийсса давурттая. Барчаллагьрай кIицI лавгунни лябукку буну зузаврихлу лахъсса зунттал районнал дянив цалчинмур кIану бугьан бювхъуну бушиву райондалул агьалинал захIматрацIух ва хIарачатрацIух. Умуд бивхьунни ялун нанисса шинавугу райондалул агьали бавкьуну ва ссавурданий хIарачат буллантIишиврий хьхьичI бивхьусса мурадру дузрайн буккан бан.
Щалагу Аьрасатнаву буллалисса «Мурадирал елка» акциялул лагрулий райондалул каялувчитурал ливккунни елкалия оьрчIал чIа тIисса мурадру чивчусса открыткарду: кIи-кIива конверт Юсуп МахIаммадовлул ва ДР-лул Халкьуннал Мажлисрал «Единая Россия» партиялул Лакрал райондалул чулухасса депутат Марат Илиясовлул, ца-ца конверт – райондалул администрациялул бакIчинал хъиривчувтурал Абубакар Къюннуевлул ва Макьсуд Макьсудовлул, райондалул депутатътурал собраниялул хъунама, ЦСОН-далул хъунама Шяпи Щурпаевлул, Лакрал ва Ккуллал районнал дянивсса прокурор ХIусайн Аьлиловлул, Культуралул управлениялул каялувчи Ансар Къажлаевлул, Гъумучиял шяраваллил администрациялул бакIчи Гъази Ккатаевлул, УСЗН-далул каялувчи Рамазан Майрановлул, Счетная палаталул хъунама Явсупи ХIамзаевлул, Шяраваллил хозяйствалул ва экономикалул отделданул каялувчи Макьсуд Кьадиевлул, Пенсионный фондрал отделениялул хъунама Шамил МухIадовлул, Аьрасатнал МВД-лул «Лакский» МО-лул каялувчи МахIаммад Рамазановлул, прокурорнал хъиривчув Араби Оьмаевлул. (Конвертирттай чивчусса оьрчIал мурадругу вайннал цинявнналагу биттур бувунни ЦIусса шин дучIаннин).
Байрандалийн бавтIминнан ххаллилсса концерт хIадур дурну дия Мариян Дандамаевал цIанийсса Гъумучиял ОьрчIал магьирлугърал къатлуву тарбия хъанахъиминнал.
Шиккува кIицI бан, Юсуп МахIаммадовлул чулуха байрандалул дукиялул пакетру буллуна ЦIусса шинал каникуллал гьантрай зузисса райондалул азарханалул хIакинтуран. Марат Илиясовлулгу азарханалун пишкаш дуруна пылесос. Дурсса къулагъасрахлу хIакинтал барчаллагьрай бия райондалул бакIчинайн ва депутатнайн.
