Январь зурул 26-нний ЦIуссалакрал райондалийсса ЦIуссалакрал 1-мур школа манзилданул режимрай зузи бунни. Ванин савав хьунни школалий зузисса чIявуми учительтал ва дуклаки оьрчIру гриппрал ва ОРВИ-лул къашавай бушиву.
Мунийн бувну, ЦIуссалакрал М.Ш. Идрисовлул цIанийсса 1-мур школалул 612 оьрчI февраль зурул 1-ннийн бияннин дуклантIиссар манзилданул режимрай. Школалий дуклакисса 14-15 шинавусса оьрчIал дянив лявкъунни COVID-19 дусса 3 оьрчI ва 4 учитель.
Му бакъассагу, манзилданул режимрайн бувцунни ЦIуссалакрал райондалийсса Гьамиящиял 1-мур школалул 38 оьрчI дуклакисса кIива класс. Ва школалийгу аьлтту хьунни COVID-19 дусса 1 иш. Аьмну, хIакьинусса кьини ЦIуссалакрал райондалий манзилданул режимрайн увцуну ур 650 дуклаки оьрчI.
Шиккува кIицI лаган, школарттай гриппрал ва ОРВИ-лул къашавай 20 % оьрчIал дарсирдайн къазанай бухьурчан, Роспотребнадзорданул хIукму буллай бур кIулшивуртту дулаврил даву дацIан дансса.
ХIакьинусса кьини райондалул вайми школарттайсса эпидемиялул тагьарданул ялув кьянкьану бавцIуну бур ЦIуссалакрал райондалул бакIчи МахIаммад-ХIажи Айдиев ва КIулшивуртту дулаврил управлениялул хъунмур Светлана Къудаева.
