ЦIусса шинал байрандалул гьантрай ЦIуссалакрал райондалул бакIчи МахIаммад-ХIажи Айдиевлул барча бунни ва бахшишру дуллунни дуккавриву хьхьичIунсса ккаккияртту хьун дурсса 340 оьрчIан.
ЦIуссалакрал райондалий аьдатравун дагьну дур шадлугърай дуккаврил шинал хIасиллу даву. Ва кьини бахшишру ларсъсса 340 отличникнава 28 дуклаки оьрчIал олимпиадарттай, личIи-личIисса конкурсирттай хьхьичIунсса кIанттурду бувгьуну бия. Мукунна наградартту дуллунни райондалул кIулшивуртту дулаврил 14 идаралий зузисса учительтурангу.
Гьашинусса дуккаврил шинал хьхьичIунсса ккаккияртту хьун дурсса дуклаки оьрчIру барча бунни цалва-цалва школалий.
Уттинин вай мероприятияртту лахъа-хъунсса даражалий дайссия райондалул Культуралул къатраву. Махъсса ппурттуву, пандемиялуцIун дархIусса тагьар хIисавравун ларсун, райондалул бакIчинал отличниктал барча буллалисса мажлисру бунни оьрчIру дуклакисса школарттай.
«ДакIнийхтуну ххари хьунна хьхьичIунну дуклакисса оьрчIал сияхI ялу-ялун хъунна хъанай душиврия. Ларгсса шинал 563 отличник ивкIхьурчан, гьашину 638 оьрчI хьунни. ХьхьичIунну дуклакисса оьрчIая жу мудангу пахрулий буссару, цанчирчан минная хъар хъанай буну тIий райондалул бучIантIимур», – увкунни МахIаммад-ХIажи Шихамировичлул.
ОьрчIру барча буллалисса, учительтурахь ва нитти-буттахь барчаллагь тIутIисса ихтилат бунни райондалул КIулшивуртту дулаврил управлениялул хъунмур Светлана Къудаевал. Цила ихтилатраву ванил кIицI лавгунни, хьхьичIунну дуклакисса оьрчIал гихунмайсса оьрмугу, дахшишру дакъасса, чаннасса бикIантIишиву.
– Умуд бур зуву дуккаврил чулухунмайсса гъирагу, шавкьгу хъиннура гужлан хьунссар тIисса, – увкунни Светлана Къудаевал.
Дуклаки оьрчIалгу райондалул бакIчинайн барчаллагь баян бунни цала чулухуннай мудан дуллалисса аякьалухлу.
