Декабрь зурул 24-нний ЦIуминалийсса ЦIуссалакрал райондалий Аьхъардал школалул дуклаки оьрчIан ххаллилсса бахшиш хьунни. Шикку тIивтIунни Дзюдорал секция.
ОьрчIал ва чIава жагьилтурал спортрал школалул директор Аьлимов Сергей Аьбдулхаликьовичлул хIарачатрайн бувну, бартлавгунни хъунмасса хIаллай школалий спортрал секция тIитIиннин ялугьлай бивкIсса дуклаки оьрчIал хиял. Ва даву дузрайн дуккан дан цащава шайсса кумаг бунни Аьхъардал шяраваллил бакIчи ГъазимахIаммад ХIасанхIусайновлул. Спортрал секциялун аьркинсса инвентарьгу ванал пиш-каш дунни.
Спортрал секция тIитIлатIисса шадлугърал мажлисрай гьуртту хьун бувкIсса бусравсса хъамаллуравух бия ЦIуссалакрал райондалул бакIчинал хъиривчу СалихI Каравалиев, ДЮСШ-рал директор Сергей Аьлимов ва Аьхъардал шяраваллил бакIчи ГъазимахIаммад ХIасанхIусайнов.
ЦIусса шинавун бухлахисса гьантрай школалун дурсса ххаллилсса бахшишрахлу дуклаки оьрчIал ва нитти-буттал чулуха барчаллагь увкунни Аьхъардал школалул директор Светлана Маммаевал.
