ЦIусса шин дайдирхьусса гьантрай ЦIуссалакрал райондалул бакIчи МахIаммад-ХIажи Айдиев ивунни дяъвилул ишру най бивкIсса, Сириянава махъунмай зана бивтсса оьрчIру ялапар хъанахъисса кулпатирттавун. Ванащал архIал бия ЦIуссалакрал райондалул КIулшивуртту дулаврил управлениялул хъунмур Светлана Къудаева ва ванил хъиривчу Бахттун Шуаьева, ЦIуссаккуллал 2-мур школалул директор Татьяна Айгунова. ЦIусса шингу барча дурну, хъамаллурал буллунни миннан нацIу-кьацIулул ва ахъулссаннул кьуцуртту.
Райондалул бакIчинал цIухху-бусу бунни оьрчIру ябуллалисса кулпатирттавусса аьркиншиннардал ялув. Мисалдаран, укунсса кулпатравусса ца оьрчIал канивун Сириянаву унийва ттуплил цIалцIив кьуртIуну диркIун дур. Утти ми дуккан дансса операция бансса квота ласун багьлай бур Санкт-Петербургливсса Г. И. Тургеневлул цIанийсса ОьрчIал травматологиялул ва ортопедиялул центрданийн. МахIаммад-ХIажи Айдиевлул махъ буллунни, цащава шайсса кумаг бувну, оьрчIал масъала дузал бансса.
ХIакьинусса кьини Сириянава зана бивтсса оьрчIру дуклай бур ЦIуминалийсса ЦIуссаккуллал 2-мур школалий. Дяъвилул ишру най бивкIсса кIанттурдава зана бивтсса оьрчIру ябуван бакIрайн лавсминнал дузал дурну дур ялапаршиннаран ва оьрчIал дуккаврин аьркинсса цинярдагу шартIру.
