Январьданул 26-нний Министртурал кабинетрал ВКС-рал низамрайсса батIаврий ххал диргьунни 2021-ку шинал республикалий национал проектру бартдигьаврил хIасиллу. БатIаврий каялувшиву дуллай ия Дагъусттаннал ХIукуматрал Председательнал буржру чIумуйсса бартбигьлагьима Аьбдулмуслим Аьбдулмуслимов.
БатIаврий махъ лахълай, Аьбдулмуслим Аьбдулмуслимовлул бувсунни ларгсса шинал 12 национал проектрал лагрулий республикалий бартдигьлай бивкIшиву 45 региондалул проект. Ми цинярда проектру бартдигьин итадаркьуну диркIун дур 23,9 млрд къурушру.
Премьер-министрнал кIанайманал тIимунийну, нацпроектру бартдигьаврил давурттан харж дурну дур 17,1 млрд къурушру, ягу итадаркьусса цинярда арцул 71,7%. Чирчуну дур 609 контракт, чичин аьркинсса 613-ннива.
Цалчин ххал диргьунни «Демография» тIисса национал проект. Му бартдигьаврил хIасиллая бувсунни ДР-лул захIматрал ва социал иширттал министрнал буржру чIумуйсса бартбигьлагьимур Изумруд МухIуттиновал. Мунил бусаврийну, му нацпроектравун духлай дур 5 региондалул проект. Ми проектру дузрайн дуккан дуван ккаккан дурну диркIун дур 7,8 млрд къурушру, миннувату шинал мутталий дурсса давурттан харж дурну дур 6,3 млрд къурушру.
Ларгсса шинал «ЦIуллушиву дуруччаву» тIисса нацпроектрал лагрулий бартдигьлай бивкIун бур 7 региондалул проект. ДР-лул цIуллушиву дуруччаврил министрнал буржру бартбигьлагьимур Татьяна Беляевал бусаврийну, проектирдал бюджет бивкIун бур 2,8 млрд къурушру, миннувату харж дурну дур 2,4 млрд къурушру ягу 88 %. Министрнал гьартану бувсунни циксса арцу цуми давурттан харж дурссарив.
«Дуккаву» тIисса нацпроектрал лагрулий дурсса давурттал хIакъираву бувсунни ДР-лул дуккаврил ва элмулул министр ЯхIия Бучаевлул. Мунал бусаврийну, ва нацпроектрал лагрулий дузрайн дуккан дурну дур 6 региондалул проект. Министрнал гьартану бувсунни «Ттизаманнул школа» тIисса проектрал лагрулий циксса ва цуми шяраваллаву бувссарив цIусса школартту, циксса школартту ва спортзаллу бакьин бувссарив.
Дагъусттаннал строительствалул министр Артур Сулаймановлул бувсунни республикалий «Инсантурансса къатри ва шагьрулул бигьалагайса кIанттурду» тIисса национал проект бартдигьаврил хIакъираву. Министрнал тIимунийну, му национал проектрал лагрулий бартдигьлай бивкIун бур 4 региондалул проект. Сулаймановлул гьартану бувсунни циксса давуртту дурссарив ми проектирдал лагрулий.
ДР-лул транспортрал ва ххуллул хозяйствалул министрнал буржру чIумуйсса бартбигьлагьима Ширухан ХIажимурадовлул бувсунни «НигьачIаву дакъасса ва хъинсса ххуллурду» тIисса нацпроект бартдигьаврил хIакъираву.
«АьФ-лул цифралул экономика» тIисса нацпроект Дагъусттаннай 2021-ку шинал бартдигьаврил хIакъираву бувсунни ДР-лул цифралул лябуккулул министрнал хъиривмур Эчив Шихаьлиевал. Мунил тIимунийну, 1552 социал мяъна дусса объект бавхIуну бур «Интернетрал» сетрацIун.
ДР-лул экономикалул ва территориал лябуккулул министр Руслан Аьлиевлул бувсунни 2021-ку шинал «ЗахIматрал лябукку» (производительность труда) тIисса нацпроект бартдигьаврил хIакъираву.
«Культура» тIисса нацпроектрал лагрулий Дагъусттаннай бартдиргьуну дур 3 региондалул проект. ДР-лул культуралул министр Зарема Буттаевал тIимунийну, проектрал бюджет бивкIун бур 469,49 млн къурушру, бартдиргьуну дур 416 млн къуруширттансса давуртту. Министрнал бувсунни цукунсса давуртту дурссарив ларгсса шинал харж дурсса арцух.
Цаппара цаймигу нацпроектирдал хIакъираву ихтилатру бунни миннул каялувчитурал.
Масъалартту ххал бигьаврил хIасиллу дуллалисса ихтилат бунни Аьбдулмуслим Аьбдулмуслимовлул.
