Киркоровлул «ацIва» бивхьусса, «Евровидениелийгу» гьуртту хьусса лакку оьрчI

Ларгсса шин ххуйсса иширттайну, хIасиллайну щаллу хьуну, ва шингу буллугъну дайдихьлай ур гьунар бусса лакку оьрчI, чIава балайчи Хушлаев Мурад Маликлул арс: 2021-ку шинал ахирданий ва, щаллагу дунияллул оьрчIал «Евровидение» тIисса музыкалул проектрай гьуртту хьуну, сий дусса конкурсрал финалистътуравух хьунни, цIуну дайдирхьусса шинал ва зурул 25-нний тIурча, Мурадлул МахIачкъалалив, Яруссаннал театрдануву, ккаккан дуван най ур цалла шамилчинсса сольный концерт. Цалчинсса концертрив Мурадлул дурссар оьрмулул 11 шинаву Москавлив, Таганкалий, Высоцкийл клубраву-ресторанналуву. КIилчинмур концерт – ва ларгсса шинал Филармониялул Гъинттулмур майданнив.

Увну ур Мурад ЦIуссалакрал райондалийсса Чапаево шяравасса Хушлаев Маликлул ва РутIуллал райондалийсса Ялув ЧIатлухъиял шяравасса Хушлаева (Рахманова) Иринал кулпатраву. Мурад акъасса, вайннал кулпатраву ур ялагу ца арс – Ярагъи, цIана аьралуннаву къуллугъ буллалисса жагьил.
Мурад оьрчIал садикрая шихунайва агьну ур творчествалухун: утренникирттай ванахьхьун мудан агьамми роллу дулайсса диркIун дур, мудангу хьхьичIкьюкьлувух ивкIун ур. Маликлул ва Иринал, цала хъунама арс Ярагъигу чIивиниява каратэлухун агьну уну, Мурадгу мукуна 3 шин хьуния шийнай занази увну ур спортрал вава журалийн. Цалчинмур классравун лавгун махъ вайннан Мурад ялагу ссахух-унугу гьан уван ччан бивкIун бур. Укун Мурад сурат дишаврил ва театрданул кружокирттайн занан ивкIун ур. Миччагу гитара бищун лахьхьин байсса кружокрайн. Гитаралухунсса балайрду хъинну ххуй бизайсса Иринал хиял бивкIун бур цила арснангу ва музыкалул ярагъ бищун лахьхьаву. Дянивмур даражалул школалий ва журалул кружок дакъану, вайннан гьан багьну бур музыкалулмур школалийн, амма шикку вайннахь увкуну бур оьрчIан ттигу ччяри гитаралухун агьан, цаярва хъунмасса инструмент ванаща канилвагу бугьан къахьунтIиссар, цалсса балай учаврилмур кружокрайн занази уварча хъина куну. Мурадлул ппу аьрали къуллугъчи ур (цIанасса чIумал Новочеркасск шагьрулий къуллугърай ур), мунияту оьрчIал дуккаврилсса буллалисса Иринал ва занази увну ур балай учаврилмур кружокрайнгу. ОьрчI балай учаврихун агьан нанисса кIул хьусса Малик рязи акъа ивкIун ур, балай учаву – му бунияласса пишарив тIий. Дахьа вокалданийн уллу­сса оьрчI махъунай уцин ми­ккусса педагогнал хьхьичI намус хьуну, Иринал ивтун ур, чансса чIун ларгун махъ уциннача тIисса пикрилий.
Цаппара хIаллавун чивчуну бур Мурадлул цалчинсса кIива балай, вай гьан бувну бур къуллугъ буллалисса МаликлучIангу. Буттан хъинну ххуй бивзун бур арснал балайрду. Муния махъ хъиннува хъунмасса гъирарай тIун ивкIун ур Мурад балайрду, вайннухунна къавтIаврилмур магьиршивугу лахьлай. Гьуртту хьуну ур щалвагу билаятрал лагрулийсса хъинну чIярусса конкурсирттай. Вай конкурсирттаву хьхьичIра-хьхьичIмур хьуну дур оьрмулул 7 шинаву Пятигорск шагьрулий. Шикку Мурад хьуну ур 3-мур даражалул дипломант. ХIакьину кунна, дакIний дур Иринан та кьини, чях буллуну гъаралгу ларчIсса, ххарил леххавай, арсгу, цуппагу (рульданух) Пятигорскалия шаппай зана хьуну най бивкIсса чIун. Гихуннай хьуну дур конкурсирттал кьюкьа: Ессентукилий, Пятигорскалий, Ростоврай, Санкт-Петербурглив, Москавлив ва цаймигу шагьрурдай. БакIрайва цаппарасса кIилчинсса кIанттурду бивкIхьурчагума, гихунмай ванал лавсъсса чIявусса дипломирттай, цайми-цаймигу наградарттай ккаккан бувну бур так 1-сса кIанттурду.
Билаятрал лагрулийсса бунияласса конкурсирдайрив Мурад гьуртту хъанай айивхьуну ур Москавлив модарду ккаккан давривух модель ва балайчи хIисаврай жюрилун ва тамашачитуран ккавккун махъ. Вания махъри Мурад Американал кIива-кIива мюзиклданувугу гьуртту хьусса: цайми оьрчIайн я ванивух, я танивух гьуртту хьун оьвкуни, Мурадлуйн кIиннивухвагу гьуртту хьун оьвкуну бур.
Ниттищал архIал Мурад хьуссар «Поле чудес» тIисса проектрайгу.
Мурад гьуртту хьусса сий дусса проектирдавасса цанний аглан хьун ччива – оьрчIал «Новая волна» тIисса. Проектрал продюсер Анастасия Мухинан хъинну ххуй бивзун бур Мурадлул чIу, балай, сахIналийсса къуццу, занакьулушин. Полуфиналданийн бувксса 600-нния ливчусса оьрчIава язи бувгьуну бур 58 оьрчI, вайннавух – Мурадгу. Му ппурттуву вай лувчIиннийсса кафелувун лавгун бур за дукан. Миву дурку­сса сэндвич къадаркьуну, Мурад хъинну къашавай хьуну ур. Хъиривмур кьини диркIун дур финалданийнсса язи бугьаврил тур. ЦIуллу-сагъшивруяр хьхьичIсса за дикIан къабю­хъайссар, шаппай гьанну тIий Иринагу бунува, яхI бувну, ув­ккун сахIналийн, щаллу бувну бур жюрилул хьхьичI цалва балай. Цалва чIунил кашигу, цалва бюхъугу щаллуну ишла буван къахьурчагу, ва хIалданий увку­сса балайлулгума жюри ясир бувну, финалданийн ­уккан бювхъуну бур. Дайдирхьуну дур финалданийнсса репетицияртту, Ялта шагьрулийн­сса хIадуршинна. Ва шагьрулий «Новая волна» конкурсрай вайннан хъинну чIярусса ххуйшивуртту, яргшивуртту ккарккун дур, Аьрасатнавух, щалла дунияллийх цIа дурксса балайчитал ккавккун бур, кIул хьуну бур миннащал.
«Новая волна» конкурсрал тIалавшиннардайн бувну, жюрилуща конкурсрал ца кьини гьурттучитуран анжагъ кIийл-кIийлва бакъа «9» ва «10» кьимат ххишала бишин ихтияр къадиркIун дур. Алфавитрал низамрай, Мурадлул фамилия дайдихьлахьисса хIарп сайки махъра-махъ дуну, иржа цинявннаяр махъ бияйсса бивкIун бур та-бухьурчагу. Мурад сахIналийн укканнинма жюрилун анжагъ кIийл-кIийлва бишин ккаккан бувсса «урчIварду-ацIварду» къаливчIун бур. Ххишала къабучIинугу, Филипп Киркоровлул, проектрал низамгу лиян дурну, бивхьуну бур Мурадлун «10». Киркоровлул, хъирив кьини гъан хьуну МурадлучIан, хъямалагу агьну, увкуну бур: «На вил цIаний конкурсрал низам лиян дурссар, цинявннайн къарши увкссара», – куну. Конкурсрал кIилчинмур кьинирив Мурадлун цимивагу «10» бивхьуну бур.
ОьрчIалмур «Евровидение» конкурсрая тIурчаннив, ва проектрал тIалавшиннардавасса цану хъанахъисса авторсса балайгу чивчуну, полуфиналданийнагу агьан хияллай ивкIсса Мурад финалданийнгума увккун ур. Балайлухунсса къавтIаврилссагу Мурадлул сайки цалва бувну бур. Ххув къахьурчангу, ххув хьусса душния, Таня Меженцевая, ххарину бур Мурад ва Ирина.
ЦIанасса чIумал Мурад щиривкIуну хIадур хъанай ур цалла шамилчинмур концертрайн. Шикку щаллу дуван чIава балайчинал репертуарданува язи дургьуну дур 32 трек: вайннува 3 – авторналсса, яни Мурадлул цалла чирчусса, «Евровидениелийгу» щаллу дурсса. Концертрайнсса цимурца, баннерду тIий, сахIна цуппа тIий, хIадур буллай бур Мурадлун цанна ххирасса кIяласса ва лухIисса рангирдай.
Мурад дуклай ур МахIач­къала шагьрулул 3-мур лицейраву 9-мур классраву. Ирина хъунмасса барчаллагьрай бур ва школалул директор Жанна Владимировнайн ва Мурадлул классрал каялувчи Зумрият Дадашевнайн цалва чIарав бацIлацIаврихлу, цанма хъинну маччасса инсантал кунма. Мурад занай ур шагьрулул 2-мур ва 8-мур оьрчIал искусствалул школардайн вокалданийн, Рамазан ва Виктория ФаталиевхъачIан, гитаралийн ва фортепианолийн. Вай цимурцаннуцIун Мурад цайми оьрчIан балай учин лахьхьин буллайгу ур. Ва ларгсса гъинттул ванал мукунсса оьрчIащал хIадур бувну бур 5 номер. Вайннувасса ца номер ккаккан бувантIиссар Мурадлул сольный концертрайгу.
ЧIал къархьуну хьунтIисса сольный концертрайгу, гихуннайсса гьарцагу давривугу тIайлабацIу чIа тIий буру жула гьунар бусса лакку оьрчIан.