Москавлив Дагъусттаннал БакIчи Сергей Меликовлул ва ПАО «Россети» компаниялул гендиректор Андрей Рюминнул ххал бивгьунни регион токрал дузал баврил хIакъиравусса АьФ-лул Президент Владимир Путиннул тапшурлугъру бартдигьаврил масъалартту. Вайннал ххал диргьунни инвентаризациялул ва заллухъру бакъасса сетру электросетирдал комплексравун цачIун даврил давуртту. ЦIанасса ппурттуву «Россети Северный Кавказ» компаниялул ишла буллай бур токрал дузал буллалисса циняв распределител сетирдал анжагъ 43%.

Сетьрал инфраструктуралул модернизациялул масъала ххал бигьлагьисса чIумал бувсунни цIанасса ппурттуву Аьрасатнал ХIукуматрайн ларсун душиву 2022-2023 шиннардий электричествалул дузал баву лахъ даврил программа, мунийну бюхъантIиссар цIу дуккан дуван аьркинлугъ ва дуван объектирдал реконструкция.
«Гьар шинах «Россети Северный Кавказ» компаниялул чIярусса арцу харж дайссар кIинтнийн хIадур шаврил давурттан. ДукIу харж дурну дия 891 млн къуруширттал, гьашину тIурча, харж дувантIиссар 1 миллиардраяр ххишаласса», – кунни Сергей Меликовлул.
«Жу хIала-гьурттуну зий буру республикалул властирдащал муштаритал токрал дузал баврил масъаларттал чулуха. Му аьркинссар региондалул лябукку хъананшиврул. ЦIана федерал даражалий ххал дигьлай бур хъуннасса программа. Мукунна дуллай буру сетьру цачIун даврил ва заллухъру бакъасса сетирдал масъалартту дузал баврил давуртту. Мунийну бюхъантIиссар дузал буван муштаритурал хьхьичI жаваблувсса цасса центр», – кунни Андрей Рюминнул.
Му бакъассагу, вай гьантрай Сергей Меликов хьунаакьинтIиссар Аьрасатнал ХIукуматрал Председательнал хъиривчув Александр Новаклущал, миккугу ххал бигьин тIий бур энергетикалул хIакъиравусса цаппара масъалартту.